ЭМЯ-ны мэдээллийн үеэр Гадаад харилцааны яамны Консулын газрын дарга Л.Мөнхтүшиг мэдээлэл хийлээ.

Тэрбээр "Манай улсад үүссэн цар тахлын нөхцөл байдлаас шалтгаалан арваннэгдүгээр сарын тусгай үүргийн нислэгүүдийг УОК-оос цуцалсан. Үүнээс болж нутаг буцах гэж байсан иргэдэд хүндрэл учирсан мэдээллүүд ирсэн. Тиймээс холбогдох элчин сайдын яамдуудад чиглэл өгч, орон байргүй, хүндрэлтэй нөхцөлд орсон 17 улсад байгаа 100 иргэний асуудлыг шийдвэрлэж байна.

Одоогоор 2154 хүн нэн яаралтай нутаг буцах хүсэлтээ гаргаад байна. Тодруулбал, Европын орноос 647, Ази 1113, Австрали 95, Америкт 295, Африкт 4 иргэн яаралтай нутаг буцах хүсэлт гаргасан. Тиймээс тусгаарлах байрны нөхцөл байдлаа харж байгаад ойрын үедээ хоёроос гурван нислэг хийхээр төлөвлөж байна. Ингэхдээ арваннэгдүгээр сард ирэхээр тийзээ захиалсан байсан иргэдээ эхний ээлжинд татан авна. 

Арваннэгдүгээр сарын 20-ноос эхлэн БНХАУ руу хийх ачаа тээвэр, тэр дундаа нүүрсний экспортод хязгаарлалт тавьсан. Бид нүүрсний экспортыг тасалдуулахгүй байх чиглэлээр ажиллаж байна. Замын-Үүдэд 50 жолоочийг байрлуулан тээвэр хийх, Монгол Улсад хийгдсэн PCR шинжилгээний хариуг урд хөрш хүлээн зөвшөөрөх зэрэг асуудал яригдаж байгаа" гэлээ. 

Б.Батчимэг