С.Баярыг Монгол Улсын Ерөнхий сайдаар ажиллаж байхдаа Монгол Улсын Засгийн газрын 2009 оны аравдугаар сарын 6-ны өдрийн “Гарын үсэг зурах эрх олгох тухай” 308 дугаартай тогтоолоор стратегийн орд болох “Оюутолгой” төслийн хүрээнд Айвенхоу Майнз Монголия Инк, Айвенхоу Майнз Лимитед, Рио Тинто Интернэшнл Холдингс Лимитед компаниудтай хөрөнгө оруулалтын гэрээг үзэглэх эрхийг нэр бүхий Засгийн газрын гишүүдэд олгож, мөн өндөр хөрөнгө оруулалтын гэрээ байгуулах нөхцөлийг бүрдүүлсэн гэх үндэслэлээр анхан шатны шүүхээс таван жилийн хорих  ял оноосон.

Харин Ч.Даваанямыг  Монгол Улсын Ерөнхий сайдаар ажиллаж байсан С.Баярын эрх мэдэл, албан тушаалын байдлаа урвуулан ашиглаж бусдад бий болгосон давуу байдлаас үүссэн хөрөнгийн эх үүсвэрийг нуун далдалсан гэх үндэслэлээр хоёр жилийн хорих ял оноосон билээ.

Харин С.Баяр, Ч.Давааням нар анхан шатны шүүхийн шийдвэрийн үл зөвшөөрөн давж заалдсан юм. Давж заалдах шатны шүүх хуралдаан өчигдөр, уржигдар хоёр өдөр үргэлжилж, шийдвэрээ гаргасан. Тухайлбал, С.Баярт анхан шатны шүүхээс оноосон таван жилийн хорих ялыг 2,6, Ч.Даваанямд оноосон хоёр жилийн хорих ялыг нэг жил болгон бууруулахаар шийдвэрлэсэн юм. С.Баярыг өмнө нь 60 хоног хорьсон ба тэрбээр “Жаран хоног жарны бутархай” номоо хэвлүүлсэн билээ.

Мөн хэргийн холбогдогч С.Баярцогт, Б.Бямбасайхан, Да.Ганболд  нарын хорих ялын хугацааг мөн Давж заалдах шатны шүүхээс бууруулсан юм. Тодруулбал, С.Баярцогтод анхан шатны шүүхээс оноосон 10 жилийн ялыг 4,6, Б.Бямбасайхан, Да.Ганболд нарт оноосон дөрвөн жилийн ялыг 1,3 жил болгон бууруулсан билээ.

Дээрх эрхмүүдэд анхан шатны шүүхээс оноосон хорих ялыг давж заалдах шатны шүүх бууруулсан нь ихээхэн боломжийг олгож байна. Нэг үгээр бол, тэд удахгүй суллагдах нөхцөл байдал үүссэн гэсэн үг. Энэ талаар Хорих ялаас хугацаанаас нь өмнө суллан, хяналт тогтоох хуулийн зохицуулалтад  “Ялтан гэмт хэрэг үйлдэж учруулсан хохирлоо нөхөн төлж зан байдлаараа нийтэд аюулгүй болсноо нотлон харуулж ял эдлэх хугацаандаа ноцтой зөрчил гаргаагүй, оногдуулсан ялын /таван жил хүртэл хугацаагаар оногдуулсан хорих ялын хоёрны нэгээс доошгүй хувийг, таван жилээс дээш арван хоёр жил хүртэл хугацаагаар оногдуулсан хорих ялын гуравны хоёроос доошгүй хувийг, арван хоёр жилээс дээш хорин жил хүртэл хугацаагаар оногдуулсан хорих ялын дөрөвний гурваас доошгүй/  хувийг эдэлсэн бол прокурорын саналыг харгалзан шүүх хугацаанаас өмнө суллаж, хяналт тогтоохоор шийдвэрлэж болно хэмээн заасан байдаг.

С.Баяр, Да.Ганболд, Б.Бямбасайхан, Ч.Давааням нар мэдээж хоригдох хугацаандаа ноцтой зөрчил гаргаагүй. Мөн учруулсан хохирлоо төлсөн, ялынхаа хоёрны нэгийг эдэлсэн. Тиймээс тэднээс хамгийн түрүүнд 1-1,3 жилийн ял сонссон Да, Ганболд, Б.Бямбасайхан, Ч.Давааням нар энэ ондоо, харин он гараад С.Баяр суллагдах магадлал өндөр байна. 

 У.Тэргэл