Өнөөдрийн байдлаар ХӨСҮТ  болон цэргийн төв эмнэлэгт  456 хүн эмчлүүлж байгаагаас маш хүнд хоёр,  хүнд дөрөв, хүндэвтэр 68, хөнгөн 382 хүн эмчлүүлж байна.

Харин эмчилгээнд ямар нэгэн хүндрэл гараагүй ба эм, тариа, тоног төхөөрөмж тэр дундаа амьсгалын аппаратын нөөц хангалттай бий гэлээ.Өчигдөр гэхэд л амьсгалын аппарат тээвэрлэсэн цуваа ирж, төрөлжсөн эмнэлгүүдэд нь хүлээлгэн өгчээ.

Эрүүл мэндийн сайд Т.Мөнхсайхан “Ковидын эмчилгээнд зориулж амьсгалын аппаратын нөөцөө хангалттай бэлдсэн. Мөн нэмж 400-г авахаар болсны 200–г арванхоёрдугаар сарын эхээр оруулж ирэх байсныг өчигдөр хүлээн авлаа. Дараагийн 200 аппарат арванхоёрдугаар сарын 20-нд ирнэ. 

Өмнө нь ХӨСҮД-т 23, Цэргийн төв эмнэлэгт 12, Яармагийн 300 ортой шинэ эмнэлэгт амьсгалын 50 аппарат суурилуулсан. Мөн аймаг, дүүргийн нэгдсэн эмнэлэгт цар тахлын үеийн бэлэн байдлыг хангах зорилгоор амьсгалын 50 аппарат суурилуулсан. Үүнээс гадна зөөврийн 20 аппаратыг ашиглахад бэлдсэн ба ашиглахад бэлэн 180 орчим аппарат бэлэн байна” гэв.