Ийм агуулгатай сануулга, мэдээллийг Тээврийн цагдаагийн албанаас гаргажээ. Уг мэдээлэлд, “Монгол Улсын Замын хөдөлгөөний дүрэмд жолооч нь зам болон цаг агаарын нөхцөл байдлаас шалтгаалан тээврийн хэрэгслийг зогсоох боломжтой бага хурдаар зорчих ёстой.  Гэтэл хөл хорионы дэглэмтэй холбоотойгоор хөдөлгөөн сийрэг үед жолооч нар хурд хэтрүүлэх, улирал, цаг агаарын нөхцөлд тохироогүй зуны дугуйтай хөдөлгөөнд оролцож яваад зам, замын байгууламж  мөргөх, бусдын болон өөрийн эд хөрөнгөд    хохирол учруулах  явдал гарсаар байна. Иймд замын хөдөлгөөнд оролцогч та бүхэн өвлийн улиралд тээврийн хэрэгслийнхээ дугуйг зориулалтын өвлийн дугуйгаар солих, хурдыг  зөвшөөрөгдсөн  хэмжээнээс 20-30 хувиар бууруулж зорчиход анхаарна уу” гэжээ.

Хатуу хөл хорио тогтоон бэлэн байдлын зэрэгт шилжсэн энэ цагт үйлчилгээний бүх байгууллага үйл ажиллагаагаа зогсоосон. Дээр хэлсэнчлэн, жолооч нарт одоо л хамгийн хэрэгтэй зүйл нь зуны дугуйгаа өвлийнхөөр солих болоод байна. Арваннэгдүгээр сарын 10-ны намрын налгар өдрөөр хөл хориог гэнэт тогтоосон учраас жолооч нар дугуйгаа сольж амжаагүй. Тиймдээ ч өнөөдөр зуны дугуйтай, халтиргаа гулгаатай замд ур чадвараа сорин явж байна. Өмнө нь  мөс шиг гялтайсан замд шөнө нь элс, бодис цацчихдаг байж билээ. Харин энэ өвлийн хувьд сураггүй л байна. Нэг өдрийн дотор гарсан ноцтой ослыг дурдъя.

-Арванхоёрдугаар сарын 3-ны шөнийн 02.30 цагийн орчим ХУД-ийн 1 хороо Чингисийн өргөн чөлөө Энхтайваны гүүрэн дээр Т жолоочтой Ниссан маркийн автомашин гүүрийн гэрлийн шон, бетонон хашлага мөргөсөн

-Арванхоёрдугаар сарын 3-ны  өглөө 08 цагийн орчим Энхтайваны гүүрэн дээр Тоёота маркийн автомашин гүүрийн гэрлийн шон мөргөсөн

-Арванхоёрдугаар сарын 3-ны өглөө 08.10 цагт ХУД-ийн 11 хороо уулын замд Тоёота приус маркийн автомашин замын хашлага мөргөн онхолдож, жолооч 42 настай, эрэгтэй Б гэмтсэн байна.

У.Тэргэл