Сүүлийн үед эрх баригч нам дотооддоо зарим сайд нартаа хариуцлага тооцон албан тушаалаас нь огцруулах асуудлыг хэлэлцэж  эхэлсэн талаар дуулдав. Түүн дотроо бүх нийтийн бэлэн байдлын зэрэгт шилжсэн энэ үед ачааны голыг үүрч байгаа ч гаргасан шийдвэр нь оновчгүй, нийгмийн дархлааг улам унагасан, бухимдуулсан сайдтан, албан тушаалтнуудад хариуцлага тооцохоор болсон гэв.   Үүнийг нь ч иргэд зөв зүйтэй хэмээн хүлээн аваад эхэлчихлээ.

Үнэндээ өнөөдрийг хүртэл олон асуудал шийдэлгүй, эргэж, буцсан, ярьснаасаа ухарч няцсан, дунд нь иргэдийг хохирогч болгосон тохиолдол нэгээр тогтохгүй. Тодруулбал, орон нутаг руу явах урсгал хэвээр ч зохион байгуулалтгүй, эмх замбараагүй хэвээр.

Бүр PCR  шинжилгээний бичиггүй хүнийг 70 мянган төгрөгөөр хулгайн замаар тээвэрлэж  өгдөг болж, том оврын ачааны автомашины ээлжийн жолоочийн бүхээгт нуугдан гарах зэргээр иргэд арга замаа олсоор.

Арваннэгдүгээр сарын 29-нд шинжилгээ өгсөн ч өнөөдрийг хүртэл хариу нь гараагүй нэгэн байхад цаг аваад очиж амжаагүй иргэний хариу сөрөг гарсан байх жишээтэй. Энэ мэт холион бантан хутгасан нь их.

Иргэд цар тахлын хатуу хөл хорионы дэглэмийг, албан тушаалтнуудын гаргасан шийдвэр бүрийг дуулгавартайгаар дагаж ирсэн.

Харамсалтай нь, тэглээ гээд хохирогч нь жирийн иргэн болж үлдэж байна. Төрийн шийдвэр ингэтлээ хүчгүйдэж, үнэгүйдэж буй нь хариуцлагагүй албан тушаалтнуудын гор юм.

“Энхсаран” сувилалд хатуу хөл хорионы дэглэмийг сахиулаагүйд хэн буруутай, дотооддоо халдвар алдсанд хэнийг буруутгах вэ, шинжилгээ авна хэмээн эмх замбараагүй байдал үүсгэж, өнөөдрийг хүртэл цэгцэлж чадахгүй байгаа албан тушаалтнууд хэн бэ, мэдрэг чанар муу түргэвчилсэн оношлуурыг 3-4,5 тэрбумаар худалдан авсан ч өнөөдөр урьтал төдий хэрэгсэл болоод байгаагийн хариуцлагыг хэн хүлээх вэ.

Шадар сайд Я.Содбаатараас энэ талаар хэвлэлийнхэн олонтаа асуусан. Харин тэрбээр цаг нь биш. Хариуцлага тооцох цаг хожим олдоно хэмээж байгаа. Харамсалтай нь,  цар тахал намжиж, амьсгаа авах тэр цагт ниргэсэн хойно нь хашгирав гэгч л болсон байх болов уу.

У.Тэргэл