Нэгдсэн Үндэстний Байгууллагын Ерөнхий Ассамблэй Хүний эрхийн Түгээмэл тунхаглалыг баталсан өдөр өнөөдөр тохиож байна. Тэртээ 1948 онд Түгээмэл тунхаглалыг зарласан энэ өдрийг Олон улсын хүний эрхийн өдөр болгон тэмдэглэдэг. Жил болгон өөр уриан доор тэмдэглэдэг эл өдөр энэ удаа цар тахлын цаг үед тохиож байна.

Манай улсын хувьд энэ өдрийг иргэн нь амьд явах эрхээ “хязгаарлуулсан” аймшигт мэдээлэлтэй угтаж байна. Хөл хорионы онцгой дэглэм ярьж, ПиСиАр-ын нарийн шинжилгээ нэхэж саатуулснаас болж нэгэн ээж эмнэлгийн анхан шатны тусламж ч авч чадалгүй хорвоог орхилоо.

Таван зуун км-ийн цаанаас найдвар тээн нийслэлийг зорьсон тэр ээжийн амьд явах эрхийг хөл хорионы дүрэм журам, хүнд суртал үгүй хийлээ. Уг нь хөл хорионы дүрэм журам, хүний амь нас, аюулгүй байдлаас давах ёсгүй билээ. Ийм байхад Үндсэн хуулиараа хүний амьд явах эрхийг тунхагласан атлаа үл тоож тасалсны хариуцлага хүлээхээс шийдвэр гаргадаг албан тушаалтнууд зайлсхийлээ.

Хүний амьд явах үндсэн эрхээс илүү цар тахлын дэглэм гэж байх ёсгүй. Иймээс Улсын онцгой комиссоос амьд явах эрхээ нэхье. Энэ эрхийн минь төлөө дуу нэгтгэхийг Хүний эрхийн үндэсний комиссын шинэхэн гишүүдэд уриалъя.

С.Сүлд