“Зон олны нам”-ын дарга Э.Одбаяртай ярилцлаа. Тэрбээр АН-ын дарга асан С.Эрдэнийн хүү бөгөөд түүнийг цагдаагийнхан сүр дуулиантайгаар баривчилж яваа бичлэг сошиалд тархсан юм. Харин тэрбээр цоо эрүүл байснаа хэлж, хөөрхөн чадуулчихлаа гэж байгаа. Энэ талаар Э.Одбаяртай ярилцлаа.  

-Тэр өдөр чухам юу болсон юм бэ. Дэлгэрэнгүй ярьж өгч болох уу ?

-Арванхоёрдугаар сарын 6-7-нд шилжих шөнийн 04 цаг өнгөрч байхад хоёр цагдаа манай гэрт гэнэт орж ирсэн.  Ямар ч зөвшөөрөлгүйгээр бусдын гэрт дайрч орчихоод гадуур хувцастайгаа, хүүхдийн мөлхдөг дэвсгэр дээгүүр гуталтайгаа туучин энд тэндгүй мөр гарган явж, их бүдүүлэг загнасан. Гэрт юу хайсан юм ОО-ын өрөө, гал тогоо руу хүртэл орсон мөр нь байна лээ. Би нэгдүгээрт, хөл хорионы энэ үед халдвар хамгааллын дэглэм сахих ёстой гэсэн  зүй ёсны шаардлага тавьсан.  Мөн эрх зүйн туслалцаа авахыг хүсч, өмгөөлөгчөө рүүгээ залгая гэтэл чирч гулдран авч гарсан. Осолтгүй  гутлаа л өмсч амжсан.

-Таныг хувцасгүй шахам хүчээр авч яваа бичлэгээс харахад цагдаагийнхан ноцтой гэмт хэрэгтэн авч яваа мэт л харагдсан. Та үүнд эмзэглэсэн үү ?

-7-8 секундын бичлэг байна лээ. Айлын гэрт дайрч орж, цоо эрүүл хүнийг эрүүлжүүлчихээд одоо болохоор барим тавин худлаа ярьж байгаа нь харамсалтай. Тухайн үед автомашинд суусан хойно цагдаа бидний дунд үл ойлголцол үүссэн. Би юуны учир баривчилж байгааг асууж, шалтгааныг хэлэхийг шаардсан. Гэтэл тэд  “Уг нь цагдаа руу авч явах байсан. Гэтэл чи согтуу байна. Эрүүлжүүлнэ” гээд шууд авч явсан. Очсон хойноо гэрийнхэнтэйгээ холбоо барих хэрэгтэй. Хаана байгаагаа хэлье гэтэл зөвшөөрөөгүй. Үнэндээ бол, хаашаа авч явсныг хэн ч мэдэхгүй байх нь аюултай шүү дээ. Өнгөрсөн зургаадугаар сард гадаадад гацсан иргэдээ өмгөөлж, хамгаалж үгээ хэлж, үзэл бодлоо илэрхийлсний төлөө  мөн намайг авч явж, хаана байсныг хэнд ч хэлээгүй. Энэ явдал сая давтагдлаа.

-Тухайн үед үнэхээр согтуу байсан юм уу?

-Би архи огт уудаггүй. Мэдэх хүмүүс нь мэднэ дээ. Хааяа нэг дарс уудаг. Тэр өдөр гэртээ байсан дарснаас жаахныг уусан.  Үнэн юм, нуугаад яах вэ дээ. Гэхдээ цоо эрүүл байсан. Цагдаа нар анх баривчилсан үндэслэлээ хэлж чадаагүй. Харин асуудал өндрөө аваад ирэхээр “Оршин суугчдын гомдлоор гэсэн. Сүүлдээ намынхаа байранд архидан согтуурч байна гэх дуудлага ирсэн”  гэж байгаа юм. Үнэхээр согтуу байсан бол эрүүлжүүлэхийн тулд согтолтын зэргийг тогтоох ёстой биз дээ. Гэтэл тэгээгүй, нэг бүтээлэг өгч бандан дээр унт гэсэн. Би унтаагүй зогсоогоороо байсаар гарч ирсэн.

-Таныг яагаад онцлоод өрөө өрөө хэсүүлээд байсан юм бэ. Тэгж дуулсан. Эсвэл эсэргүүцэл үзүүлсэн юм уу ?

-Анх нэг өрөөнд оруулахад тэнд бүтээлэг нөмөрсөн олон хүн байсан. Эрүүл ахуйн наад захын шаардлага хангаагүй байна  гэж шаардлага тавьсны төлөө намайг өөр өрөөнд оруулсан. Тэндээсээ удалгүй гаргаад дахин өөр өрөөнд ганцааранг минь оруулсан. Гэрээсээ нимгэн подволк, гэрийн дотуур өмдтэй гарч ирсэн болохоор би дулаацах гэж дасгал хийж эхэлсэн юм. Гэтэл эрүүлжүүлэхийн цагдаа нар энгэрийн камераа зүүчихсэн өрөөнд орж ирээд нүүр рүү чичлэн элдвээр хэлж, ээлжийн ахлагч нь “Чамайг ямар хөгийн баагий гэдгийг мэднэ. Чи тэгээд яах юм”  гэж доромжилж эхэлсэн. Амьхандаа миний тэвчээрийг барж, би цагдаа нарын биед хүрч ийм л зүйлийг хүссэн хэрэг. Дараа нь хүйтэн агааржуулагч үлээлгэсэн. Агааржуулагч шүүгч байхгүй учраас гадаа хасах хэдэн хэм байна тэр хүйтэн агаар өрөөнд шууд орно гэсэн үг. Ийм л нөхцөлд өглөө болгосон доо.

-Сошиалаар нэг таны тухай мэдээлэл цацаж, С.Эрдэнийн хүүг архидан согтуурч, танхайрсных нь төлөө баривчиллаа гэж шуугьсан. Энэ үеэр Хууль зүйн сайд “Одбаярыг баривчлаагүй” гэж пост оруулсан. Энэ тухай та мэдсэн үү ?

-Арванхоёрдугаар сарын 7-ны орой Хууль зүйн сайд ийм агуулгатай пост хийсэн байсан. Гэтэл ЦЕГ-ын Хэвлэл, мэдээлэл, олон нийттэй харилцах  албаны дарга Б.Баатархүү нь “Намын байран дээрээ архидан согтуурч байхад нь авч явсан” гэж мэдэгдэх зэргээр тэдний ам, ажлын зөрүү ийм л байдаг. Цоо эрүүл хүнийг эрүүлжүүлэхэд аваачиж хонуулчихаад  үүнийгээ цайруулахын барин тавин зохиомол зүйл ярьж, намайг архидан согтуурч, иргэдийн амгалан тайван байдлыг алдагдуулсан, танхайрсан хэрэгт баривчиллаа гэдэг ойлголтыг нийгэмд өгчихөж байгаа юм. Ерөнхийдөө намайг шоглочихлоо л гэж ойлгосон.  

-Яагаад шоглосон гэж. Цагдаа нарт ингэх шалтаг байгаа юм уу. Ер нь энэ бүхний шалтгааныг хэрхэн харж байна вэ ?

-Хөнгөхөн шоглоод сануулга өгчихлөө. Хөөрхөн чадчихлаа гэж ойлгосон. Гадаадад гацсан монгол иргэдийнхээ төлөө үзэл бодлоо илэрхийлж, дуу хоолойгоо хүргэсний минь төлөө саатуулж, байцаалт авсан нь олон. Тусгаарлалтын 21 хоногийг 14 болгооч, бусад улсад ийм байна гэсний төлөө цагдаагаас дуудсан. Гэтэл саяхан 14 хоног болгочихлоо шүү дээ.

- Таныг С.Эрдэнийн хүү гэдгээр нь шоглосон байж болох уу ?

-Тийм байхыг үгүйсгэхгүй. Гэхдээ би багын л улс төрийн үйл ажиллагаатай холбоотой элдэв сенсаац, мэдээлэл дунд явж ирсэн учраас хүчтэй реакц үзүүлэхээ байсан. Нэг үгээр, хувь тавилантайгаа эвлэрсэн гэх үү дээ.

-Танай намын хурал болж, таныг даргаараа сонгосон гэсэн. Үүнтэй холбоотойгоор архидан согтуурсан гэж ойлгосон юм биш үү ?

-Манай намын хурал арванхоёрдугаар сарын 6-нд цахимаар болсон. Хурлаас намайг “Зон олны нам”-ын даргаар сонгосон. Цахимаар хуралдсан байхад юун бөөнөөрөө архидах вэ. Тийм асуудал ер болоогүй.

-Таныг хэл амаар доромжилж, элдэвлэсэн ээлжийн ахлагчийг хэн гэдэг мэдсэн үү ?

-Отгонхүү гэсэн. Харин маргааш нь Сүхбаатар дүүргийн цагдаагийн хэлтэст намайг аваачихад хүнлэг харилцсан эхний хүн нь Энхжаргал байцаагч байсан шүү. Энд хэлэхэд, улаан зоосгүй хүн эрүүлжүүлэхэд орлоо гэхэд хэцүүдэх юм билээ. Зөрчлийн тухай хуулиар 100 мянгаар торгохоос эхлээд бие, сэтгэлийн хүчирхийлэлд давхар өртөж байна. Нөгөө хүний эрхийн байгууллагууд, ХЭҮК хаана байна. Эрүүлжүүлэх байранд халдвар хамгааллын наад захын дэглэмийг огт мөрдөхгүй байна. Амны хаалт ч үгүй юун нөгөө хатуу хөл хорио вэ. Энд хүний эрхийн зөрчил дэндүү их харагдсан. Ганц намайг ингэлээ гэж байгаа юм биш. Эрүүлжүүлэхэд байгаа хүмүүс бие, сэтгэл санааны хүчирхийлэл дор байдаг нь алхам тутам мэдрэгдэж байсан. Эрүүлжүүлэх байр эрүүл мэндийн байгуулагын харьяанд нэг хэсэгтээ байсныг санаж байна. Тэр нь зөв байсан. Хүний эрх талаасаа. Даанч хэл ам гарснаас шийдвэрээсээ ухарсан юм билээ. Харин одоо бол эрүүлжүүлэхэд юун хүний эрх ярих. Харин ч эрүүл мэндэд нь хор хохирол учрах, амь насаа алдах эрсдэл ойрхон байна.

-Та одоо яах вэ. Гомдол гаргах уу ?

-Хууль, хүчний байгууллагуудын алба хаагчидтай холбоотой гомдлыг 126 дугаарт утсаар, мөн цахимаар өгдөг юм билээ. Харин би өнөөдөр (өчигдөр(  цагийн хязгаарлалт тавигдахаар өөрийн биеэр очиж гомдлоо өгөхөөр гарах гэж байна.

-Ярилцсанд баярлалаа.

У.Тэргэл