Сангийн сайд Ч.Хүрэлбаатар Ерөнхийлөгч Х.Баттулгыг дахин донгодов. Монгол Улсын Ерөнхийлөгч Х.Баттулга 2021 оны төсвийн тухай хууль болон дагалдан батлагдсан хуулиудад бүхэлд нь хориг тавихад тэрбээр хатуухан шүүмжилж байсан билээ.

Тодруулбал, Сангийн сайд Ч.Хүрэлбаатар өөрийн цахим хуудсаараа дамжуулан "Ерөнхийлөгчийн 2021 оны төсөвт тавьсан хоригийг хараад сууж байна. Уламжлал ёсоороо алдаатай, зөрчилтэй хориг болжээ. Төсөвт бүхэлд нь эсвэл, хэсэгчлэн хориг тавьдаг. Бүхэлд нь хориг тавьж байна гэчихээд Эрүүл мэнд, нийгмийн даатгалын санд хориг тавихгүйгээр зөвхөн Улсын төсөвт хориг тавьжээ. Алдаагүй юм хийж болдоггүй л юм байх даа. Арай ч дээ" хэмээн хатуу үг "чулуудаж" байсан юм. 

Тэгвэл тэрбээр Ерөнхийлөгчийг дахин шүүмжилжээ. Тодотговол, Монгол Улсын Ерөнхийлөгч Х.Баттулга оффшор бүсээс орж ирсэн хөрөнгөөр өрх бүрд нэг сая төгрөгийн дэмжлэг үзүүлэх тогтоолын төслийг өчигдөр өргөн барьсан билээ. 

Үүнд нь Сангийн сайд Ч.Хүрэлбаатар хариу илгээж, оффшор бүсээс төрийн санд ямар ч мөнгө орж ирээгүй гэдгийг мэдээлэв.

Тэрбээр "Оффшороос ямар ч мөнгө төрийн санд орж ирээгүй. Оффшороос мөнгө оруулж ирвэл улсын орлого эсвэл тухайн иргэний мөнгө эсэхийг шүүх эцэслэн тогтоох ёстой. Хувь хүний хөрөнгийг улс хураан авахыг зөвхөн шүүх шийднэ. Монгол хуульгүй, дүрэмгүй улс уу? диктатор гараад ирчихсэн юм уу?" хэмээн бичжээ.

Б.Баатар