Шүүхийн ёс зүйн хорооны Ажлын албаны дарга Н.Ганбаатараас шүүгчидтэй холбоотой үүсээд байгаа асуудлын талаар тодрууллаа.
-Бичлэгт гарсан шүүгч нартай холбоотой асуудалд Шүүхийн ёс зүйн хорооноос хариуцлага тооцох уу. Ямар арга хэмжээ авах вэ?
-Ийм мэдээлэл гарсан нь харамсалтай. Шүүхийн Ёс зүйн хороо иргэн албан тушаалтан, хуулийн этгээдийн гомдлыг хүлээн авч хянан шийдвэрлэдэг дүрэмтэй. Харин шүүгч нартай холбоотой асуудалд иргэний зүгээс гомдол гаргасан байгаа. Энэ сарын 22-ны өдөр буюу өнгөрсөн даваа гарагт “Нэхүүл” хөдөлгөөний тэргүүн бичлэгт дурдагдсан шүүгч нартай холбоотой гомдол ирүүлсэн. Ёс зүйн хорооны дарга гишүүдэд цохоод, ирсэн гомдлыг шалгах ажиллагаа явж байгаа. Ёс зүйн хороо 30 хоногийн дотор шалгана. Энэ хоног хангалтгүй, өөр тогтоож шалгах асуудал бий гэж үзвэл дахин 30 хоног сунгадаг зохицуулалттай.
-Ес зүйн хорооны 4-5 гишүүний бүрэн эрхийн хугацаа дуусгавар болсон. Тиймээс асуудлыг шийдвэрлэхэд удаашрах магадлалтай гэж байна?
-Ёс зүйн хорооны зарим гишүүний бүрэн эрхийн хугацаа дууссан тохиолдол байгаа. Одоогоор гурван гишүүн дутуу, зургаан гишүүнтэйгээр ажиллаж байна. Эдгээр зургаан гишүүн гомдлыг шалгаж, нийт гишүүдийн хурлаар хэлэлцүүлэх бололцоотой бүрэлдэхүүн гэж ойлгож болно.
-Шүүхийн ерөнхий зөвлөлөөс шүүгчдийг тагнаж ,чагнасан байж болзошгүй тухай мэдэгдэл гаргасан байсан. Харин ёс зүйн хороо ямар байр суурьтай байгаа вэ?
-Шүүхийн ерөнхий зөвлөлөөс мэдэгдэл гаргасан байна билээ. Харин Ёс зүйн хороо энэ үйл явдалд оролцохгүй. Ёс зүйн хороо энэ талын байр сууриа илэрхийлэх боломжгүй. Шүүхийн ерөнхий зөвлөл өөрийн чиг үүргийн хүрээнд шүүгчийн хараат бус, аюулгүй байдлыг хангах, шүүхэд итгэх иргэдийн итгэлийг бэхжүүлэхэд гол анхаарлаа чиглүүлж ажилладаг. Тиймээс өөрийнхөө хүрээнд олон нийтэд хандаж гаргасан мэдэгдлийг нь харсан.
-Шүүгчийн ёс зүйн талаар Ёс зүйн дүрэмдээ хэрхэн заасан байдаг вэ?
-Шүүгчийн ёс зүйн дүрэм нэлээн нарийн. Шүүгчид олон улсын Барын холбоо, Ерөнхий шүүгчдийн зөвлөлдөх зөвлөлөөс гаргасан кодын хүрээнд заасан дүрэм, журмыг мөрдөн ажиллах үүрэгтэй. Өнгөрсөн хугацаанд ч гэсэн шүүгч нарт сахилгын хариуцлага хүлээлгэх чиг үүргээ хэрэгжүүлж ирсэн. Мэдээж асуудлыг шалгаж, тогтоох ёстой. Шүүгчийнхээ ёс зүйн дүрмээ зөрчсөн байна гэдгийг тогтоох нь тухайлбал, би биш. Би ажлын албаны дарга. Шүүхийн ёс зүйн хороо байна. Мөн хэрэг мөрдөн байцаах байгууллагууд байгаа. Эдгээр нь өөрсдийн чиг үүргийн дагуу хэргийг мөрдөн шалгаж, тогтоох ёстой. Эцэстээ шүүхийн шийдвэр, ёс зүйн хорооны дүгнэлт гарснаар гэм буруугийн асуудлыг ярина. Түүнээс өмнө бид урьдчилаад тийм ийм байна, олон нийтийн сүлжээгээр гарсан асуудал буруу юм гэж дүгнэх хуулиар олгосон хэм хэмжээ, эрх байхгүй.
У.Тэргэл
Сэтгэгдэл (2)