Ерөнхий  сайд Л.Оюун-Эрдэнэ Монголын үндэсний олимпийн хорооны Ерөнхийлөгч Н.Түвшинбаяраас нүүр бурууллаа. Одоогоос сар гаруйн өмнө буюу хоёрдугаар сарын 15-ны өдөр Монгол Улсын Засгийн газрын Хэвлэл мэдээлэлтэй харилцах газраас Ерөнхий сайд Л.Оюун-Эрдэнэ "МҮОХ-ны Ерөнхийлөгч Н.Түвшинбаярыг зөвлөхөөрөө ажиллуулахаар болсон" гэдгийг мэдээлсэн.  Гэвч үүнийгээ өнөөдрийг хүртэл албажуулаагүй байжээ. 

Энэ талаар Ерөнхий сайд Л.Оюун-Эрдэнийн хэвлэлийн төлөөлөгч Ч.Болортуяа "Энэ жил олимпийн наадам болох учир Засгийн газраас Монгол үндэсний олимпийн хороог  бодлогоор дэмжих агуулгаар Ерөнхийлөгчийг нь Ерөнхий сайдын орон тооны бус зөвлөхөөр ажиллуулахаар шийдсэн. Гэхдээ шийдвэр нь өнөөдрийг хүртэл албажаагүй учир чөлөөлөх асуудал үүсэхгүй" гэх мэдээллийг өгчээ.

МҮОХ-ны Ерөнхийлөгч Н.Түвшинбаяр өнгөрөгч баасан гарагт буюу дөрөвдүгээр сарын 2-ны  өдөр Улсын начин Э.Энхбатыг зодож, биед нь хүнд гэмтэл учруулсан. Тиймээс Н.Түвшинбаярыг яллагдагчаар татан 20 хоног цагдан хорих, таслан сэргийлэх арга хэмжээ аваад буй юм.

Уг асуудалтай холбоотойгоор Н.Түвшинбаярыг Ерөнхий сайдын зөвлөхөөс чөлөөлж, түүний өмнөөс Ерөнхий сайд Л.Оюун-Эрдэнэ хүлцэл өчих ёстой гэх байр суурийг иргэд илэрхийлэх болсон. Энэ нь ч Н.Түвшинбаярыг орон тооны бус зөвлөхөөр томилох шийдвэр албажаагүй гэдэгтэй холбоотой байхыг үгүйсгэхгүй. 

Ямартай ч нэр нь сэвтэж, алдар хүнд нь шороотой хутгалдаад буй Н.Түвшинбаяраас Ерөнхий сайд Л.Оюун-Эрдэнэ ийнхүү нэрээ "цэвэрлэж" авав. 

Б.Баатар