Монгол Улсын Үндсэн хуулийн Цэцийн 2021 оны дөрөвдүгээр сарын 16-ны өдрийн дунд суудлын хуралдаанаар Монгол Улсын Ерөнхийлөгчийн сонгуулийн тухай хуулийн гуравдугаар зүйлийн 3.1.2 дахь заалт, 5 дугаар зүйлийн 5.4, 5.6, 26 дугаар зүйлийн 26.2 дахь хэсэг тус тус Монгол Улсын Үндсэн хуулийн холбогдох заалтыг зөрчсөн эсэх маргааныг хянан хэлэлцэж хоёрдугаар дүгнэлтээ гаргасан юм.  Тодруулбал, өмнөх болоод өдгөөгийн Ерөнхийлөгчид Монгол Улсын Ерөнхийлөгчийн сонгуульд нэр дэвших эрхгүй гэх шийдвэрийг гаргасан билээ.

Үндсэн хуулийн Цэцийн дунд суудлын энэ удаагийн хуралдаанд Д.Солонго, Ц.Нанзаддорж, Г.Баясгалан, Д.Одбаяр, Г.Туулхүү нарын таван хүний бүрэлдэхүүнтэйгээр хуралдахаар анх товлосон. Гэвч хуралдаан эхлэхээс өмнөхөн Цэцийн гишүүн Ц.Нанзаддорж тодорхойгүй шалтгаанаар хуралд оролцохоос татгалзсан тул түүний оронд шинээр томилогдоод удаагүй Ж.Эрдэнэбулганыг бүрэлдэхүүнд оруулж, хуралдсан юм.

Гэтэл дунд суудлын хуралдааны шийдвэрийг хоёр гишүүн нь эсэргүүцэн ҮХЦ-ийн дарга Н.Чинбатад эсэргүүцэл бичсэн байна. Тэд Монгол Улсын Ерөнхийлөгчийн санал болгосон Цэцийн гишүүн Б.Буяндэлгэр болон дунд суудлын хуралдааны бүрэлдэхүүнд орохоос эрс татгалзсан  Ц.Нанзаддорж нар гэдгийг эх сурвалж хэлж байна. Тэд өөрсдийг нь санал болгосон Ерөнхийлөгчийнхөө эсрэг ямар нэгэн үйлдэл хийх хэрэгтэй болно. Энэ нь ач тусыг нь хариулж буй хэрэг гэдгийг хэн ч төвөггүй ойлгоно.

Харин ҮХЦ-ийн дарга Н.Чинбат энэхүү эсэргүүцлийг хүлээж авах эсэх нь тодорхойгүй байна.

У.Тэргэл