ШШГЕГ-ын харьяа хорих ангиудад коронавирусний халдвар эрчимтэй тархаж, өнөөдрийн байдлаар Цагдан хорих 409, 461 ангиуд өвчний голомт болоод байна. Өнөөдрийн байдлаар, 200 орчим хүн халдвар авч, заримыг нь эмчилж, заримыг нь тусгаарлаад байгаа юм. Тэдний дунд шүүхээс ял сонсоод хорих анги руу хуваарилагдах гээд хүлээж байсан, шүүх хурал нь товлосон хугацаанаасаа хойшилсон яллагдагч, сэжигтэн болоод шүүхээр хэргээ шийдүүлж, гэм буруугаа дэнслүүлж амжаагүй залуус ч байна. Мөн шүүхийн шийдвэрээр 14-30 хоногоор баривчлан саатуулсан гээд олон хүн өнөөдөр халдварын голомтод байна.  

Өмгөөлөгчид хүний эрхийг зөрчиж байгааг хорих ангийн удирдлагуудад хэлээд ч тодорхой арга хэмжээ авах боломж хомс учраас ганц авч буй арга хэмжээ нь шүүхүүд шүүх хуралдааныг хойшлуулж, таслан сэргийлэх тодруулбал, хорих ялаар иргэдийг шийтгэхгүй байх. Шийтгэхээс аргагүйд хүрвэл цагдан хорих хугацааг хойшлуулах явдал аж. Хуульч Б.Мэргэн “Хорих ангиуд Монголд анх халдвар дэгдэхэд л арга хэмжээ авч, зайлшгүй тохиолдолд байр сав, эмнэлэг бэлдсэн байх шаардлагатай байсан. Гэвч хойрго, назгай хандсанаас болж өнөөдөр нөхцөл байдал хүндэрч байна. Нөгөөтэйгүүр, хүнийг нэг секунд ч илүү цагдан хорьж болохгүй хүний эрхийн хуультай.  ХЭҮК ч үүнд анхаарал хандуулах шаардлагатай” гэж байв.

У.Тэргэл