Чингэлтэй дүүргийн 5 дугаар хороонд үйл ажиллагаа явуулдаг нэр бүхий бааранд 2020 оны 1 дүгээр сарын 10-ны өдөр болсон нээлтийн үйл ажиллагааны үеэр хүмүүсийн дунд олон төрлийн архи, согтууруулах ундааг хольж уух, уусан тохиолдлын тоогоор  мөнгө, валют  хожих  болзолтой  тэмцээн зохион байгуулж, уг тэмцээнд оролцсон 30 гаран насны иргэн Ө олон төрлийн найрлага бүхий согтууруулах ундааг их хэмжээгээр нэг дор богино хугацаанд хэрэглэснээс болж амь насаа алдсан хэрэг гарсан.

Тодруулбал, тус тэмцээнд оролцогчдод баарны зүгээс орц найрлага нь өөр 7 төрлийн 2 литр согтууруулах ундаа, 1 төрлийн 250 мл энергийн ундааг 3 минутын хугацаанд уулгасанаас хохирогч тэр даруй спиртийн агууламжийн хурц хордлогод орсон ажээ.

Чингэлтэй дүүргийн прокурорын газраас уг баарны эзэн иргэн Д-г Эрүүгийн хуулийн тусгай ангийн 10.6 дугаар зүйлийн 1 дэх хэсэгт заасан “Хүний амь насыг болгоомжгүйгээр хохироох” гэмт хэрэг үйлдсэн гэсэн үндэслэлээр яллах дүгнэлт үйлдэн тус дүүргийн Эрүүгийн хэргийн анхан шатны шүүхэд шилжүүлсэн бөгөөд шүүхээс хэргийг энэ оны 1 дүгээр сард хянан хэлэлцээд, хохирогч өөрийн сайн дурын үндсэн дээр тэмцээнд оролцсон учраас шүүгдэгч Д нь гэм буруугүй байна гэж дүгнэн хэргийг цагаатгасан байсан юм.

Тэгвэл тус хэргийг анхан шатны шүүхээр дахин хэлэлцэхээр болжээ. Учир нь Чингэлтэй дүүргийн прокурорын газраас анхан шатны шүүхийн шийдвэрийг үндэслэлгүй гэж үзэн эсэргүүцэл бичсэн ба Давж заалдах шатны шүүх өнгөрсөн долоо хоногт хэргийг хянан хэлэлцээд цагаатгах тогтоолыг хүчингүй болгож, хэргийг анхан шатны шүүхээр дахин хэлэлцэх нь зүйтэй шийдвэрлэсэн байна.

Олон төрлийн согтууруулах ундааны зүйлийг хольж, нэг дор их хэмжээгээр хэрэглэх нь хүний бие эрхтэнд шууд нөлөөлөн эрүүл мэнд, амь насанд аюултай хор уршиг урчуулах боломжтой гэдгийг бүх хүн мэддэг боловч ийнхүү хайхрамжгүй хандаж бусдын амь насанд эрсдэл учруулахаас иргэд сэрэмжлэх хэрэгтэй.