ХӨСҮТ-ийн захирал асан Д.Нямхүү өнгөрсөн хоёрдугаар сарын 18-нд шүүхэд ажилд эргүүлэн томилуулах талаар нэхэмжлэл Сүхбаатар дүүргийн иргэний хэргийн анхан шатны шүүхэд гаргасан. Тэгвэл удаан хугацаанд хойшилсон шүүх хуралдаанаас түүнийг ажилд нь эргүүлэн томилох тухай шийдвэр гарсан талаар эх сурвалж мэдээллээ.

Тодруулбал, Улсын Нэгдүгээр төрөхөөс коронавирусний халдвартай эхийг ХӨСҮТ рүү халаадтай авч гарсан нь олны дургүйцлийг хүргэж, улмаар тус газрын дарга болон НЭМГ, ХӨСҮТ-ийн дарга нарыг өмнөх сайд Т.Мөнхсайхан албан үүргээс нь чөлөөлж, өөрөө Эрүүл мэндийн сайдын албаас чөлөөлөгдөх хүсэлтээ өгч байсан билээ. Гэвч уг шийдвэрийг Д.Нямхүү хууль бус гэж үзэн ийн шүүхэд хандсан юм.

Ташрамд дурдахад, 2016 онд түүнийг албан тушаалаа ашиглан өөртөө нэмэлт урамшуулал, цалин хөлс авдаг нь тогтоогдсон асуудлаар албан үүргээс нь чөлөөлж байсан ч шүүхийн шийдвэрээр дахин томилогдож байсан юм.

Б.Лхам