Ерөнхий боловсролын сургуулийн сурагчид нэгнээ дээрэлхэн, бүлэглэн зодож байгаа бичлэг цахим орчинд цацагдаад байгаа билээ. Энэ хэргийн талаар ЦЕГ-ын Гэр бүлийн хүчирхийлэл, хүүхдийн эсрэг гэмт хэрэгтэй тэмцэх хэлтсийн дарга Э.Баярбаясгалангаас тодруулахад “Гудамж талбайд сурагчид нэгнээ зодож буй бичлэг цацагдсан. Энэ хэргийн бичлэг нь өнөөдөр цахим орчинд тавигдсан ч тус хэрэг өнгөрсөн бямба гаригт болсон байсан. Хэргийг нягтлахаар бүх хэлтэс рүү бичлэгийг явуулж шалгуулж байна. Эзэн холбогдогч нь тогтоогдвол эрүүгийн хуулиар хариуцлага тооцно. Хүүхдүүд нэгнээ зодох, гэмтэл учруулсан тохиолдолд хохирогчийн гэмтлийн зэргээс нь шалтгаалан арга хэмжээ авдаг. Тиймээс хэргийг тодруулахаар ажиллаж байна” гэлээ.