Хөгжлийн банктай холбоотой асуудлаар зарим албан тушаал бүхий хүмүүсийн шүүх хурал Чингэлтэй, Баянзүрх, Сүхбаатар дүүргийн эрүүгийн хэргийн анхан шатны шүүхэд үргэлжилж байна. Энэ тухай асуудлаар Хөгжлийн банкны дэд захирал асан Ч.Мөнхбаярын өмгөөлөгч Б.Баатарсайхан мэдээлэл өглөө. Тэрбээр “Ч.Мөнхбаярыг 30 хоног цагдан хорих шийдвэрийг шүүх гаргалаа. Хөдөлшгүй нотлох баримт шүүхэд ирүүлэгүй учир нотлох баримт байхгүй гэж өмгөөлөгчдийн зүгээс үзэж байна. Тиймээс бид хуулийн дагуу шүүхийн шийдвэрийг давж заалдах гомдол гаргана. Энэ хэрэг гурав дахь жил дээ орж байна. Зээл олгохдоо албан тушаалаа урвуулан ашигласан, бусдад давуу байдал олгосон гэсэн үндэслэлээр шалгаж байна. Улс төрийн нөлөөлөл орсон хэмээн хардаж байгаа. Гурван жилийн хугацаанд энэ хэргийг үнэн мөнийг тогтоох үндэслэл байсан ч яагаад ийнхүү удааж байгааг мэдэхгүй юм. Ч.Мөнхбаяр дуудсан цагт ирж мэдүүлэг өгч, хэрэг хянан шийдвэрлэх үйл ажиллагаанд саад болсон зүйл байхгүй. Өчигдөр бидэнд мөн л ажлын бус цагаар шүүх хуралдааны товыг мэдэгдлээ. Шүүхээс мэдэгдээгүй үед үүнийг зөрчил гэж харж болохоор юм. Прокурорын санал өчигдөр 15:30 цагт ирсэн. Шүүх холбогдох үүрэгтэй ч мэдэгдээгүй. Прокурорын санал үндэслэлгүй гэж өмгөөлөгчийн зүгээс үзэж байна. Гурван жил шалгагдаж байгаа асуудлыг өнөөдөр ийм байдлаар шийдвэрлэж байгаа нь учир дутагдалтай. Өнөөдөр нийгмийн сэтгэлзүйд хөтлөгдөж ийм арга хэмжээ авч байгааг өмгөөлөгчид хүлээн зөвшөөрөхгүй. Хуулийн дагуу гомдол гаргана” гэв.