Хөтөлийн цементийн шохой ХК-ын асуудлаар Төрийн өмчийн бодлого зохицуулалтын газрын дарга Б.Цэнгэл мэдээлэл хийлээ. Тэрбээр “Тус үйлдвэрийн хувьцаа эзэмшигчдийн хэрэгжүүлж байгаа, тэдний даалгавараар ажиллаж байгаа хүмүүс бидэнд тодорхой шаардлага тавьж байна. Бидний зүгээс хэвийн ажиллах нөхцөл боломжоор хангаж, өрөө тасалгаа гаргаж өгөөч гэсэн шаардлага тавьсан. Үүний дараа бидэнд ирүүлсэн шаардлага бичигтээ хувьцаа эзэмшигчдийн зүгээс ийм чиглэл өгөөгүй учир боломжгүй гэсэн хариу өгсөн. Тиймээс дахин ярилцахаар шийдээд, хоёр талын зүгээс ярилцсан хэдий ч дахин татгалзсан хариу өгсөн. Ийм нөхцөл байдал үүссэн учраас “Төрийн болон орон нутгийн өмчийн тухай хууль”-ийн 62 дугаар зүйлд зааснаар, холбогдох төрийн байгууллага, цагдаагийн алба хаагчдыг байлцуулаад тодорхой хэмжээгээр ажил хүлээлцье, тамга тэмдэгээ хүлээлгэж өгөөчээ гэсэн боловч татгалзаж, оффисыг орхиж гарсан. Иймд тус обьектыг төрийн хамгаалалтад авч, бүх өрөөг лацадлаа. Ирэх даваа гаригаа үйл ажиллагаа үргэлжилнэ” гэв.