УИХ-ын чуулганы нэгдсэн хуралдаан үргэлжилж байна. Гол нэр төрлийн зарим бараа бүтээгдэхүүний үнийн өсөлт, хомстлоос сэргийлэх, сөрөг нөлөөллийг бууруулах тухай” хуулийн төсөл болон хамт өргөн мэдүүлсэн хуулийн эцсийн хэлэлцүүлэг өрнөж байна.

Энэ үеэр УИХ-ын гишүүн Д.Өнөрболор өөрийн байр суурийг илэрхийллээ. Тэрбээр “Миний хувьд энэхүү хуулийн төслийг дэмжиж байгаа. Гэхдээ суурь өөрчлөлт болоод бодлогын өөрчлөлтийг зайлшгүй хийх ёстой гэж үзэж байна. Цар тахал, дайн гэх гадаад шалтгааныг  нэрлэхээс гадна суурь шалтгааныг дотоод шалтгаантайгаа холбож харах нь зөв гэж бодож байна. Инфляцын нийт тоон дүнгийн хойноос хөөцөлдөх гэхээс илүү статистикийн тоо баримтаас гол оношийг  харвал инфляцын 50.9 хувийг импортын барааны өсөлт эзэлж байна. Тиймээс хил гаалийн гацаа, хүндрэл хаана байгааг даруй шийдвэрлэ, импортын урсгалыг саадгүй болго гэсэн үг. Импортын хэрэгцээгээ өөрсдөө хангахад бодлогоо чиглүүлэх шаардлагатай. Ерөнхий сайд гэхээс илүү салбарын сайд нар, тэр дундаа бодлогын яамдыг тэргүүлж байгаа сайд нар ажлаа илүү сайн хий гэсэн үг.

Сүүлийн 30 гаруй жил өрхийн үйлдвэрлэлээс үндэсний үйлдвэрлэл, үндэсний үйлдвэрлэлээс үндэсний баялаг бүтээгч боох хүртэл аж ахуйн харилцаагаа дэмжээгүйтэй холбоотой. Ингэж ажиллаагүй улс өнөөдөр өрийн хавх, валютын ханшны дарамт, импортын хараат байдал, инфляц, үнийн өсөлт зэрэг хүндрэлээс гарах боломжгүйг бид ойлгох ёстой.

Үгүй бол түр зуурын заслаар бид хол явахгүй. Үүний гол гарц нь худалдааны тухай хуультай болох ёстой. Миний бие энэ хуулийн төслийг ахалж байгаа. Энэ хууль гурван УИХ-ыг дамжсаар батлагдах нь бүү хэл бараг хэлэлцэгдээгүй, унаж, унагаж ирсэн түүхтэй. Эцэст нь хөрөнгө оруулалтын хуулийн төслөөр дамжуулаад миний нэр хүндэд халдах, үндэсний дайсан болгох оролдлогыг хийж ирсэн. Хийе, бүтээе гэсэн нэгнээ ингэж хорлож болохгүй. Улсаа тэтгэх, хүндрэлийг даван туулах гол зам нь яалт ч үгүй худалдааны хуультай болох асуудал байгаа  юм. Тиймээс энэ асуудалд гишүүд анхаарлаа хандуулж дэмжиж өгөөсэй гэж хүсье" гэв. 

Т.Мөнхжаргал