Нийтийн мэдээллийн ил тод байдлын тухай хууль 2022 оны тавдугаар сарын 01 -ээс хэрэгжиж эхэлнэ. Тус хуульд мэдээлэл хариуцагч мэдээллийг гуравдагч этгээдэд дамжуулсан бол мэдээллийн эзэнд энэ талаар хуульд заасан журмын дагуу мэдэгдэл хүргүүлнэ. Мөн мэдээлэл хариуцагч мэдэгдэл хүргэх системийг ашиглан хүн, хуулийн этгээдэд дараах тохиолдолд цахим хэлбэрээр мэдэгдэл хүргэнэ гэж заажээ. Үүнтэй холбоотойгоор Цахим хөгжил, харилцаа холбооны яам болон И-Монгол академиас "МЭДЭГДЭЛ ХҮРГЭХ СИСТЕМ”-ийг өнөөдөр олон нийтэд танилцууллаа.
Боловсрол, шинжлэх ухааны сайд Л.Энх-Амгалан "Иргэд 650 орчим төрийн үйлчилгээг цахимаар авах боломж бүрдсэн бөгөөд энэ ондоо багтаан 1200 төрийн үйлчилгээг цахимжуулах төлөвлөгөөтэй байна. Цахим шилжилттэй холбоотой 70 тэрбум орчим төгрөгийг хэмнэсэн төдийгүй Монголын төрийн үйлчилгээг хүртээмжтэй, шуурхай хүргэхэд хамгийн чухал нөлөөг үзүүлж байна. “Мэдэгдэл хүргэх систем” ашиглалтад орсноор иргэн өөрийн мэдээлэлд ямар байгууллагаас, хэзээ хандсаныг мэдэх, хянах боломж бий болох юм. Өөрөөр хэлбэл, төрд буй таны мэдээллийг ямар байгууллагаас ямар байгууллагад шилжүүлж , ашигласан талаар та мэдэх боломжтой болж байгаа гэсэн үг юм. Дээрх мэдэгдэл нь "e-Mongolia" системийг ашигладаг иргэн бүрд автоматаар очих бөгөөд "е-Mongolia" гар утасны аппликейшн болон www.e-mongolia.mn сайтын мэдэгдэл цэсэд дэлгэрэнгүй байдлаар ирнэ” гэв.
Өнгөрсөн 2021 онд төрийн байгууллагууд хоорондоо нийтдээ 511,421,585 удаа мэдээлэл солилцжээ. "E-Mongolia" систем өнөөдрийн байдлаар хоёр сая орчим хэрэглэгчтэй бөгөөд иргэд давхардсан тоогоор 10 сая гаруй төрийн үйлчилгээг цахимаар аваад байна . Тус системд өнөөдрийн байдлаар төрийн 60 байгууллагын 648 үйлчилгээ болон 13 аймгийн нутгийн захиргааны 863 үйлчилгээ цахимжиж, нэгтгэгдээд байгаа аж.
