Экологийн цагдаагийн албанаас Дорнод аймагт үйл ажиллагаа явуулж буй Шинь шинь ХХК-д холбогдох хэргийн талаар болон Сэлэнгэ аймагт үйл ажиллагаа явуулдаг ойн ангиудад холбогдох хэргийн талаар мэдээлэл хийлээ.

1. Дорнод аймгийн Дашбалбар сумын нутагт байрлах Улааны холимог металийн орд эзэмшиж байгаа тусгай зөвшөөрөл эзэмшигч Шинь Шинь ХХК-д холбогдох эрүүгийн гэмт хэрэг 2013 онд шалгагдаж байгаад тухайн үедээ хэрэгсэхгүй болж хаагдсан. 2018 онд уг хэргийг дахин сэргээж шалгаад шинээр шинжээч томилох шаардлагатай гэж үзсэн. Шинжээчийн багийн дүгнэлтээр холимог металийн орд газрыг хамарсан талбайн хөрсөн дэх хүнд металийн тархалт болон хаягдал усны далангийн шүүрлийн талбайд байгаль орчинд учруулсан хохирлын хэмжээг тооцож нийт 672 сая төгрөгийн хохирол учруулсан нь тогтоогдсон тул өнгөрсөн тавдугаар сарын 31-нд яллагдагчаар татсан.
2. Ойн ангийн албан тушаалтан хүмүүс эрүүгийн хэрэгт шалгагдаж байгаа гэсэн мэдээлэл явсан. Тус албанаас хууль бусаар мод бэлтгэх гэмт хэрэгтэй тэмцэх чиглэлээр шалгалтын ажиллагаа явуулаад ойн ангийн дарга, инженер, зарим сумдын засаг дарга нартай холбоотой үйлдлийг илрүүлсэн. Улмаар эрүүгийн хэрэг хянан шийдвэрлэх тухай хуульд заасны дагуу авилгатай тэмцэх газарт 13 хүний үйлдлийг шалгуулахаар шилжүүлсэн" гэв. 

Т.Мөнхжаргал