Н.Түвшинбаярт холбогдох хэргийн шүүх хурал Хан-Уул дүүргийн эрүүгийн хэргийн анхан шатны шүүхэд хоёр дах өдрөө үргэлжилж байна. Тус хэргийн яллагдагчаар татагдсан Н.Түвшинбаяр өөрийн үгээ хэллээ.

Тэрбээр “Юун түрүүнд миний бие гэм буруугаа туйлийн ихээр хүлээн зөвшөөрч, маш ихээр гэмшиж байгаа. Өөрийгөө хийж болохгүй үйлдэл хийсэн гэж бодож байна. Талийгаач найзынхаа ар гэр, хань ижил үр хүүхдүүдээс нь чин сэтгэлээсээ уучлалт хүсье. Мөн аав ээж, ах дүү, төрөл төрөгсөд бүгдээсээ уучлалт хүсье.

Миний найз хамгийн сайн найз байсан. Хамтдаа хүсэл мөрөөдлөө ярьж, миний амжилтад найз минь салшгүй холбоотой явсан найзынхаа амь насанд хүрэх нөхцөлд ирнэ гэж огт бодоогүй явсан.

Энд танхимд сууж байгаа бүх хүнээс уучлалт хүсэж байна. Мөн миний найзыг дэмждэг байсан Монголын ард түмэн, бүх хүнээс уучлалт хүсэж байна. Уучлаарай. Найзынхаа гэр бүл, үр хүүхдэд цаашдаа насан туршдаа тус дэм болно гэдгээ хэлье. Энэ бүгдэд би буруутай. Эрхэм шүүгчид хандаж энэ хэргийг хууль ёсны дагуу шийдэж өгөхийг хүсэж байна” гэв.

Т.Мөнхжаргал