Цагдаагийн ерөнхий газраас Улсын хэмжээнд зохион байгуулж буй "Илрүүлэлт-Оргодол-2022" нэгдсэн арга хэмжээний талаар мэдээлэл өгч байна. Энэ үеэр Эрүүгийн цагдаагийн албаны Эрэн сурвалжлах хэлтсийн дарга, цагдаагийн хурандаа Д.Очгэрэл мэдээлэл өглөө.

Тэрбээр "Монгол Улсын хууль зүйн сайд Х.Нямбаатарын тушаалаар Шүүхийн шийдвэр болон Цагдаагийн ерөнхий газар хамтран “Оргодол” гэдэг арга хэмжээг есдүгээр сарын 9-нөөс арванхоёрдугаар сарын 12-ны өдрийг хүртэл зохион байгуулж байна. Эрэн сурвалжлагдаж буй оргодол эртээдүүдийг олж илрүүлэх, хэрэг материалыг шийдэх чиглэлээр хамтран ажиллаж байна.

Арга хэмжээний хүрээнд өнөөдрийг хүртэлх хугацаанд нийт 54 этгээдийг олж тогтоосон байна. Үүнээс шүүхийн шийдвэр биелүүлэхээс зайлсхийсэн этгээд 29, торгох ялаар шийтгэгдсэн этгээт нэг, нийтийн ажил хийхээс зайлсхийсэн этгээд дөрөв, зорчих эрхийг хязгаарлах ял буюу цахим бугуйвч зүүсэн этгээд 19-г олж тогтоосон байна.

2017 оноос хэрэгжиж эхэлсэн зорчих эрхийг хязгаарлах ялаар нийт 117 этгээд оргон зайлж эрэн сурважлагдсан. Үүнээс 100 иргэнийг илрүүлж, одоогийн байдлаар 17 этгээдийг эрэн сурвалжилж байна.

“Оргодол” арга хэмжээний хүрээнд “Илрүүлэлт-оргодол 2022” арга хэмжээг есдүгээр сарын 12-ноос арваннэгдүгээр сарын 1-ны хооронд зохион байгуулагдана. Энэхүү арга хэмжээг цагдаагийн байгууллага жил бүр уламжлал болгон зохион байгуулдаг.

-Эхний 16 хоногийн дүн мэдээгээр 1725 хүн, мал, эд зүйлсийг олж тогтоосон-

Үүнд оргодол 106, гэмт хэрэгт сэрдэгдсэн этгээд 658, сураггүй алга болсон 91, хэн болох нь тогтоогдоогүй цогцос тав, галт зэвсэг гурав, зөрчлийн хэрэгт эрэн сурвалжлагдаж буй этгээд 130, тээврийн хэрэгсэл 72, хорихоос өөр ял шийтгэгдсэн этгээд гурав байна” гэв.

Д.Батчулуун