Хил хамгаалах 0245 дугаар ангид алба хааж байсан цэрэг боомилсон байдалтай олджээ. Энэ талаар Хил хамгаалах ерөнхий газрын олон нийттэй харилцах албаны дарга Д.Энхтайван хэвлэл мэдээллийн байгууллагад дараах мэдээллийг өгчээ.

Тэрбээр "Амиа алдсан цэргийн алба хааж байсан малын суурь нь хилийн заставаас 10 орчим км-ийн зайд оршдог. Малын суурь нь хил хамгаалах байгууллагын нэг нэгж, хилийн зурваст малаа хариулангаа хяналт тавьж үзлэг хийдэг.

Тэнд хоёр цэрэг, нэг ахлагч байсан. Дарга цэргийн дарамт үүссэн гэж ард иргэд ойлгоод байх шиг байна. Тийм зүйл байхгүй.

Үүрэг гүйцэтгэж байгаа цэргүүдийг сэтгэл зүйн хувьд тогтвортой, бие бялдрын хувьд сайн, хамгийн итгэл даах хүмүүсээ тийш нь явуулдаг. Тиймээс яг ямар байдлаас болж энэ асуудал үүссэн бэ гэдгийг одоохондоо хэлж мэдэхгүй байна. Хилийн цэргийн бүх ангиудад сэтгэл зүйч, салбаруудад сэтгэл зүй эрхэлсэн орлогч гэж бий.

Бидэнд тухайн цэргийн сэтгэл зүйн байдал алдагдсан гэх ямар нэг мэдээлэл ирээгүй. Хамт байсан ахлагчийн хувьд найман жил харуул удирдаж цэргүүдтэй ажилласан. Харин нөгөө цэргийн хувьд ямар нэг сахилгын зөрчил гаргаж байгаагүй, сэтгэл санааны хувьд тогтвортой" гэв.

М.Сүхэхэй