ЦЕГ, Монголбанк, Монголын Банкны холбооноос хамтран цахим залилах гэмт хэргийн нөхцөл байдлын талаар мэдээллээ. Энэ талаар ЦЕГ-ын кибер гэмт хэрэгтэй тэмцэх албаны дарга мэдээлэл өглөө.
Тэрбээр "2022 оны эхний арван сарын байдлаар 31 мянган гэмт хэрэг бүртгэгдсэн 10 мянга нь зөвхөн залилах гэмт хэрэг байна. 2021 онтой харьцуулахад энэ нь өссөн бөгөөд 88.2 хувийг зөвхөн цахим залилан эзэлж байна. Нийт 810 тэрбум төгрөгийн хохирол учирсан ба үүнээс 710 тэрбум төгрөгийг нь нөхөн төлүүлсэн. Иймд дээрх гэмт хэргүүдээс сэргийлэхийн тулд "Unsend" буюу "Бүү шилжүүл" хэмээх аяныг 14 хоногийн хугацаанд явуулахаар болсон.
Цахим залиланд өртсөн иргэдийн ихэнх нь фэйсбүүк хаягаа алдсантай холбоотой юм. Таны гар утсан дээр ирж байгаа үсэг тооноос бүрдсэн цахим хаягийн нууц үг бол таны гэрийн түлхүүр гэсэн үг.
Гэрийн түлхүүрээ хэн дуртайд нь өгч болохгүйтэй адил хариуцлагатай байхыг анхааруулж байна. Мөн урьдчилгаа төлбөр нэрээр залилан хийх болсон. Тйимээс урьдчилгаа төлбөр хийхдээ баттай эх сурвалж эсэхийг хянадаг байх хэрэгтэй. Үүнээс гадна хуурамч дуудлага хэлбэрээр нууц үгийг чинь авахаар төлөвлөдөг болсон. Тийм учраас иргэд үүнд маш болгоомжтой хандаж, хувийн мэдээллээ өгөхгүй байхыг анхааруулж байна.
Нэмэлт мэдээлэл өгөхөд, энэ төрлийн гэмт хэргийн хохирогчид бол 35-аас дээш насны иргэд байна. 35-аас дээш насны иргэд цахим мэдээллийн аюулгүй байдлыг хамгаалах чадвар сул байна. Мөн энэ төрлийн гэмт хэргийг хөдөө орон нутаг руу чиглэх хандлагтай байна" гэв.
Д.Батчулуун