Монгол Улсад Гэмт хэргээс урьдчилан сэргийлэх ажлыг зохицуулах зөвлөл, Хууль зүй, дотоод хэргийн яам, Хөдөлмөр, нийгмийн хамгааллын яамтай хамтран НҮБ-ын Хүн амын сан, Швейцарийн хөгжлийн агентлагийн дэмжлэгтэйгээр “Гэр бүлийн хүчирхийлэлтэй тэмцэхэд олон талт хамтын ажиллагаа” хамтарсан багийн үндэсний V чуулганыг 2022 оны 11 дүгээр сарын 14-ний өдөр төрийн ордонд зохион байгуулж байна. Чуулганыг нээж Хууль зүй, дотоод хэргийн сайд Х.Нямбаатар үг хэллээ.
Хууль зүйн сайд Х.Нямбаатар "Гэр бүлийн харилцаа материаллаг хууль, бичмэл хуулиар бичиж бүхэлд нь зохицуулж болдоггүй хүн хоорондын нарийн харилцаа бий. Үүнээс үүдэн гардаг зарим зөрчил гэр бүлийн хүчирхийлэлд хүргэх хандлагыг бий болгодог.
Өнгөрсөн 5-6 жилийн хугацаанд Монгол Улсын төрөөс гэр бүлийн хүчирхийлэлтэй тэмцэхэд бүгдийг чиглүүлэх ёстой гэдэг том бодлого барьж байна. Цагдаагийн байгууллагын дуудлага мэдээллийг энэ чиглэлд хүргэх ёстой гэдэг агуулгаар ажиллаж ирсэн. Жил бүр гэр бүлийн хүчирхийллийн улмаас 5000 орчим хүн баривчлах шийтгэл эдэлж байна. Харин энэ тоо буурахгүй байгаа нь асуудал болдог. Иймээс үүнийг шийдэх гарц гаргалгаа олохын тулд өнөөдөр бид цуглаад байна.
Энэ ажиллагаанд хүүхэд хамгааллын ажил хоцорч үлдээд байгаа. Үүнийг хэрэгжүүлэх хүмүүс нь Хамтарсан баг. Тэд ажил үүргээ хэрэгжүүлэхэд төрөөс ямар нэг төсөв байдаггүй, үндсэн ажлынхаа хажуугаар гэр бүлийн хүчирхийлэлтэй тэмцэхэд ажилладаг. Энэ хүмүүсийн ажлын үр дүнд энэ чиглэлээр тодорхой ахиц дэвшил гарч байна гэдгийг төрийн шийдвэр гаргадаг албан тушаалтнууд, төсөв баталдаг хүмүүст харуулахын тулд энэ зөвлөгөөнийг зохион байгуулж байна” гэв.
Тус чуулганд гэр бүлийн хүчирхийллээс урьдчилан сэргийлэх, хүчирхийллийн болзошгүй эрсдэлтэй гэр бүлийг илрүүлэх, хүчирхийллийн хохирогчид үйлчилгээ үзүүлэх, хамгаалах чиг үүрэг бүхий улсын хэмжээнд үйл ажиллагаа явуулж буй 735 хамтарсан багийн 800 гаруй төлөөлөгчид оролцож байна.
Т.Мөнхжаргал