Эхнэртээ 60 сая төгрөгийн үнэ бүхий цэцгийн баглаа илгээсэн залуугийн тухай цахим орчинд олны анхаарлын төвд ороод буй. Тэгвэл уг цэцгийн баглааг Ерөнхий сайдын зөвлөх А.Амундра илгээсэн талаар зарим мэдээллийн сайтууд нийтлээд байсан юм. Харин энэ бүхэн огт үндэслэлгүй, худал мэдээлэл болох талаар А.Амундрагийн өмгөөлөгч О.Санчирбал өөрийн цахим хаягтаа бичжээ. 

Уг худал мэдээлэл нь иргэн А.Амундрагийн нэр төрд халдаж, гэр бүлийн хүрээнд үл ойлголцол гарах хэмжээнд хүргэсэн хэмээн Чингэлтэй дүүргийн цагдаагийн газарт гомдол гаргажээ. 

Уг гомдолд, 2022 оны 11-р сарын 14-ний өдөр "...хэн нэгэн этгээд найз бүсгүйдээ 60 сая төгрөгийн үнэ бүхий цэцэг хүргүүлсэн" тухай мэдээлэл олон нийтийн сүлжээгээр тарж эхэлсэн бөгөөд 11 дүгээр сарын 15-нд “Ерөнхий сайд Л.Оюун-Эрдэнийн зөвлөх А.Амундра 60 сая төгрөгийн сарнайгаар бэлэг барьжээ” гэсэн агуулга, гарчиг бүхий мэдээлэл нийт 100 гаруй сайтад зохион байгуулалттайгаар тараад байна.

Миний үйлчлүүлэгч энэ мэдээлэлтэй ямар ч хамааралгүй бөгөөд энэ худал мэдээллээс болж түүний гэр бүлд үл ойлголцол үүсэх бодитой нөхцөл бүрдлээ. Өөрөөр хэлбэл түүний эхнэр, гурван хүүхдэд муугаар нөлөөлж, сэтгэл санаа, эрүүл мэндэд хохирол учирч эхлээд байна. Цаашилбал, Ерөнхий сайдын зөвлөх 60 сая төгрөгөөр цэцэг авдаг мэтээр ойлгуулж байгаа бөгөөд, нөгөөтэйгүүр А.Амундра нь Ерөнхий сайдын зөвлөхөөр огт ажилладаггүй талаар дурдаж байна" хэмээжээ.