Хүний эрхийн Үндэсний Комиссоос дотуур байранд амьдарч буй хүүхдүүдийн эрх, эрх чөлөөг сахин хангаж, хамгаалах үүднээс нөхцөл байдлыг газар дээр нь шалгаж, илэрсэн зөрчлийг таслан зогсоох, арилгуулах зорилгоор Улаанбаатар хот болон 21 аймаг, сумдад үйл ажиллагаа явуулж байгаа дотуур байруудад хяналт, шалгалт хийжээ. 

Тус ажлын хэсэг Өмнөговь аймгийн Даланзадгад сумын Ерөнхий боловсролын Нэгдүгээр сургууль, Ханбогд сумын Ерөнхий боловсролын Нэгдүгээр сургууль болон Төв аймгийн Ерөнхий боловсролын "Хүмүүн" цогцолбор сургуулийн дэргэдэх дотуур байрны үйл ажиллагаанд хяналт шалгалт хийхэд хэд хэдэн нийтлэг алдаа дутагдал илэрчээ. 

Төрийн үйлчилгээний алба хаагчдын цалин амжиргааны зардалд хүрэлцдэггүй байдал нь хүний нөөцийн орон тоо дутагдахад хүргэдэг, дотуур байрны камерын хяналтын систем хангалтгүй, дотуур байранд амьдарч буй хүүхдийн нэг өдрийн хоолны зардлыг 3475 төгрөгөөр тооцдог нь хоолны хүртээмж, шим тэжээл, илчлэг чанарт хүрэхгүй байх эрсдэл дагуулдаг зэрэг нийтлэг зөрчил, дутагдал илэрсээр байна.

Тодруулбал, Өмнөговь аймгийн Ханбогд сумын Ерөнхий боловсролын Нэгдүгээр сургууль болон дотуур байр дундаа ганц тогоочтой. Тогооч ганцаараа сургуулийн 400 гаруй сурагчийн "Үдийн хоол" болон дотуур байрны 24 хүүхдийн өглөөний цай, өдөр, оройн хоолыг бэлтгэдэг.

Ачаалал их байдаг учир өдөр бүр уртгасан цагаар ажилладаг талаар хэлжээ. Хэдийгээр тогоочийн хоёр, бэлтгэгчийн хоёр орон тоо байгаа ч төрийн үйлчилгээний алба хаагчийн цалингийн шатлал бага учир ажил горилох иргэд тэр бүр олддоггүй гэдгийг сургуулийн болон дотуур байрны багш нар ХЭҮК-ын ажлын хэсэгт тайлбарласан байна. 

Дээрх хяналт, шалгалтын үр дүнг үндэслэн хүний эхийн зөрчлөөс урьдчилан сэргийлэх зорилгоор Комиссын гишүүний зөвлөмжийг, хүний эрхийн зөрчлийг арилгуулах, таслан зогсоох зорилгоор комиссын гишүүний шаардлагыг холбогдох эрх бүхий албан тушаалтанд хүргүүлэх юм.

Хүний эрхийн үндэсний комисс