Монголын Шүүхийн шийдвэр биелүүлэх газрууд буюу хорих ангиудад дэлхийн аль ч улс оронд байхгүй хоёр жишиг байдаг. Эхнийх нь хоногийн уулзалт, хоёрдахь нь шагналт хоног. Хорих ял эдлэж байгаа иргэн гэр бүлийнхэнтэйгээ 72 цаг хүртэл тусгай өрөөнд хамт байх боломж олгодог хоногийн уулзалт уг нь хүний эрхийг дээдэлсэн сайн жишигт тооцогддог.

Шүүхийн шийдвэр гүйцэтгэх газрын албан хаагчид хоногийн уулзалтыг Хүний хувийн мэдээлэл хамгаалах тухай хуулийн 9.1 дэх хэсэгт заасны дагуу зохион байгуулдаг юм байна. Тодруулбал, “...Энэ хуулийн 4.1.12-т заасан эрүүл мэнд, захидал харилцаа, генетик болон биометрик мэдээлэл, тоон гарын үсгийн хувийн түлхүүр, бэлгийн болон хүйсийн чиг баримжаа, илэрхийлэл, бэлгийн харилцааны талаарх хүний эмзэг мэдээлэл нь хүний нууцад хамаарна...” гэсний дагуу хоногийн эргэлтийг зохион байгуулдаг.

Эргэлтээр ирж байгаа ар гэрийнхнийг нь, авч ирсэн эд зүйлсийг нь нарийн шалган тусгай өрөөнд уулзалтыг зохион байгуулдаг бөгөөд заасан хугацаанд тэр өрөөнд шүүхийн шийдвэр гүйцэтгэх газрын алба хаагчид нэвтрэх эрхгүй байдаг гэсэн үг ээ. Хүний хувийн мэдээлэл хамгаалах тухай хуулийн дагуу тодорхой хугацаанд, тогтсон өрөөнд хоногийн эргэлт авч байгаа хоригдол болон ар гэрийнхнээс нь өөр харгалзах хүнгүйгээр болдог энэ уулзалт уг нь манай улсын шүүхийн шийдвэр гүйцэтгэх байгууллагын хүний эрхийн индексийг нэлээд өсгөж байдаг үзүүлэлт. Гэсэн ч харамсалтай нь Шүүхийн шийдвэр гүйцэтгэх газрын харьяа ...дугаар ангид нэгэн хоригдол хоногийн эргэлтээр очсон гэр бүлийн хүнээ хөнөөгөөд өөрийгөө боомилсон хэрэг өчигдөр гарчээ. Хүний хувийн мэдээлэл хамгаалах тухай хуулийн дагуу хоногийн эргэлтийн өрөөнд хоригдол болон ар гэрийнхнээс нь өөр хүн орох эрхгүй байдгаас ийм харамсалтай хэрэг гарсан бололтой.

А.Лхам