Хоёр өдөр хуралдсан түр хорооны гишүүд нотлох баримтыг шинжлэн судлах сонсголоо дүгнэж үг хэлэв Энэ үеэр УИХ-ын гишүүн, Хянан шалгах түр хороог даргалагч Ж.Бат-Эрдэнэ байр сууриа илэрхийллээ.

Тэрбээр, "Хянан шалгагч, шинжээчиддээ баярлалаа. Энэ парламентын хийсэн олон далайцтай ажлуудын нэг нь Хяналт шалгалтын тухай хуульд өөрчлөлт оруулсан явдал гэж үзэж байна. Хууль бус хэргүүд мэдээгээр түгдэг ч олон нийт үнэн мөнөнийг нь мэдэж чаддаггүй, эздийг нь мэдэж чаддаггүй байсан. Одоо энэ асуудлыг УИХ анхаарч, нээлттэй сонсгол хийдэг болсон. Үүний үр дүнд Хөгжлийн банк, нүүрс, эмийн будилаан, ногоон автобусны үйл ажиллагаатай холбоотой мэдээллийг ард түмэнд өглөө. Олон нийт хариуцлага нэхэж байгаа. Хариуцлагаа ч тэд хүлээх ёстой.

Магадгүй, бид хариуцлагатай байх тал дээр өөрсдөөсөө эхлэх ч хэрэгтэй байх. Энэ сонсголын ажлын хэсэгт бүрэн дүүрэн орж ажиллаагүй гишүүд хүртэл нэлээн юм ярилаа. Бүх асуудалд хуулийн дагуу, хариуцлагатайгаар ажиллах ёстой шүү. 

Тендерийн хуулийг тойрсон Үндэсний аюулгүй байдал гэсэн асуудал гарч ирж байна. Тагнуулын газар руу бичиг явуулдаг, бусад байгууллагуудаас тусламж авдаг, тендерт ялахын тулд ТЕГ-ын нэрийг урдаа барих зэргээр хуйвалдаж байна.

Хэдийгээр зарим нэг эрх бүхий албан тушаалтан сонсголд ирээгүй ч нотлох баримтад түшиглэн гэрчүүдийн үгийг сонслоо. Яаж будилаан хутгаж, хуйвалддаг, яаж мөнгө цавчдаг болохыг бид өнөөдөр харлаа.

Ногоон автобус шиг хулгай дахин гарахгүй байхын төлөө бүгдээр энд сууж байна. Би төрийн байгууллагууддаа итгэдэг. Гэхдээ зөв удирдах ёстой.

Эцсийн эцэст бүх зүйл менежерүүдээс шалтгаалдаг. Сайд, дарга нараас л шалтгаалдаг. 

Тендерийн тухай хуулийг зөрчиж байгаад, зүгээр л нийтийн тээврийн газраас хэдэн нэрс авч, наймаа хийх боломжтой газруудын нэрсийг жагсааж байгаад, түүнээсээ Тэнүүн-Огоо компанийг сонгочихсон байна гэдэг нь ил тод боллоо. Цаашид асуудалд бүх шатныхан анхаарах хэрэгтэй" гэв. 

М.Дэвээ