Жүдо бөхийн 2026 оны насанд хүрэгчдийн дэлхийн аварга шалгаруулах тэмцээн Азербайжаны нийслэл Баку хотод үргэлжилж байна. Аравдугаар сарын 5-нд буюу тэмцээний хоёр дахь өдөр эрэгтэйчүүдийн -66 кг, эмэгтэйчүүдийн -52 кг-ын жингийн барилдаанууд явагдах бөгөөд Монголын дөрвөн жүдоч татамид гарна.

Өнөөдөр эрэгтэйчүүдийн -66 кг-ын жинд Ёндонпэрэнлэйн Басхүү болон Өлзийбаярын Бямбасүрэн нар өрсөлдөнө. Басхүү дэлхийн аваргын тэмцээнээс хоёр хүрэл медаль хүртэж байсан, 2021 онд дэлхийн аваргын -66 кг-ын жинд хүрэл медаль хүртсэн туршлагатай тамирчин юм. Тэрбээр энэ оны зургаадугаар сард Чиндаогийн Гран прид тавдугаар байр эзэлсэн бөгөөд дэлхийн чансааны 31 дүгээрт бичигдэж байна.

Харин Ө.Бямбасүрэн 23 настай бөгөөд энэ оны есдүгээр сард Унгарын Их дуулгаас мөнгөн медаль хүртэж, дэлхийн чансааны 69 дүгээрт эрэмбэлэгдэж байна. 

Эмэгтэйчүүдийн -52 кг-ын жинд Монголын Мягмарсүрэнгийн Нандин-Эрдэнэ, Баянмөнхийн Уранзаяа нар хүч үзнэ. Нандин-Эрдэнэ энэ жингийн дэлхийн чансааны 13 дугаарт бичигдэж байгаа бөгөөд 2026 онд Азийн аварга шалгаруулах тэмцээнд түрүүлж, Душанбегийн болон Казахстаны Их дуулгаас тус бүр хүрэл медаль хүртсэн амжилттай.

Харин Уранзаяа энэ оны Азийн наадмаар тавдугаар байр эзэлсэн бөгөөд дэлхийн чансааны 39 дүгээрт эрэмбэлэгдэж байна. Бакуд болж буй ДАШТ-д нийт 93 орны 622 жүдоч оролцож байгаа бөгөөд тэмцээн аравдугаар сарын 4-10-ны өдрүүдэд үргэлжилнэ. Өнөөдрийн урьдчилсан барилдаан Баку хотын цагаар 10:00 цагт эхлэх бөгөөд Монголын цагаар 14:00 цагт эхэлнэ. Шигшээ барилдаан 18:00 цагт буюу Монголын цагаар 22:00 цагт эхлэх хуваарьтай байна.

Л.Баяр