ОХУ-ын Сибирийн Иркутск мужид тахлын халдвар судалдаг хүрээлэнгийн ажилтан Дарья Шипилова гэх бүсгүй тодорхойгүй хатгалгаагаар өвдөж, нас барсан нь олон нийтийн дунд уушгины тахал тархсан байж болзошгүй гэх болгоомжлол үүсгээд байна. Зарим эх сурвалжид түүнийг уушгины тахлын нянтай харьцах үедээ алдаа гаргасан гэж үзэж байгаа юм. Үүнтэй холбогдуулан түүний ойрын хавьтал 200 орчим хүнийг эмнэлгийн хяналтад авч, зарим хэсэгт хөл хорио тогтоожээ.
Гэвч уг эмэгтэйн үхэлд “шалтгаан тодорхойгүй хатгалгаа” гэсэн онош тавьсан талаар ОХУ-ын Хэрэглэгчийн эрхийг хамгаалах, хүний сайн сайхны хяналтын холбооны алба буюу Роспотребнадзор мэдээлжээ. Тус байгууллагын мэдээлснээр өвчтөний биологийн сорьцод түүний мэргэжлийн үйл ажиллагаатай холбоотой бичил биетэн илрээгүй байна.
Мөн хүрээлэнд эмгэг төрүүлэгч бичил биетэнтэй ажиллах явцад ямар нэгэн осол гарсан гэх баримт шалгалтаар тогтоогдоогүй байгаа гэж Оросын хэвлэлүүд мэдээлж байна. Үүний ард үнэнг нууж уснаас хуурай гарах гэсэн оролдлого байгаа, цаашлаад үр дагавар нь корона вирусын хэмжээнд ч хүрч болзошгүй гэж сэрдэх хүн цөөнгүй байгаа аж. Роспотребнадзорын тэргүүн Анна Поповагийн даалгавраар ажилласан шинжээчдийн комисс ч биологийн аюулгүй байдлын зөрчил илрээгүй гэж дүгнээд байгаа гэнэ.
Гэсэн хэдий ч уг ажилтан нас барсан тухай мэдээлэл тархсаны дараа Иркутск болон ойролцоох Шелехов хотод халдвар хамгааллын арга хэмжээ авч, түүнтэй ойр байсан хүмүүсийг эмнэлгийн хяналтад оруулсан үйл явдал нь олон нийтэд улам бүр сэжиг төрүүлээд байна. "Reuters" агентлагийн мэдээлснээр, ойролцоогоор 200 хүн ажиглалтад орсон бөгөөд Роспотребнадзорын мэдээллээр тэдний дунд хоёр COVID-19, хоёр риновирусын тохиолдол илэрсэн ч бусад халдварын үүсгэгч илрээгүй байна.
10 дугаар сарын 5-ны байдлаар талийгч эмэгтэйтэй холбоо тогтоосон хүмүүсийн 60 хувьд нь эмнэлгийн ажиглалт хийсэн бөгөөд Иркутск муж, Иркутск болон Шелехов хотуудын ариун цэвэр, халдвар судлалын нөхцөл байдлыг Роспотребнадзор “тайван” гэж үнэлжээ.
Энэ үеэр сошиал орчинд уг эмэгтэйг уушгины тахлаар нас барсан гэх мэдээлэл тархсан боловч одоогоор Оросын эрх баригчид үүнийг батлаагүй байна. Роспотребнадзорын албан ёсны мэдээлэлд оношийг “шалтгаан тодорхойгүй хатгалгаа” гэж тэмдэглэсэн хэвээр байгаа юм.
ДЭМБ-ын мэдээллээр тахал нь "Yersinia pestis" нянгаар үүсдэг бөгөөд уушгины хэлбэр нь хүнээс хүнд амьсгалын замаар дамжих боломжтой. Гэхдээ тахлыг баталгаажуулахын тулд лабораторийн шинжилгээгээр уг нянг илрүүлэх шаардлагатай. Иймээс Иркутскт тахлын дэгдэлт гарсан гэж одоогоор дүгнэх үндэслэл байхгүй бөгөөд албан ёсны шинжилгээгээр тахлын халдвар батлагдаагүй байна. Харин холбогдох хүмүүсийн тандалт, шинжилгээ үргэлжилж байгаа бөгөөд нөхцөл байдлыг Роспотребнадзор хяналтдаа авчээ.
Эх сурвалж: ОХУ-ын Роспотребнадзорын мэдээллийг иш татсан ТАСС, Интерфакс; Reuters; ДЭМБ.
