УИХ-д ч, улс төрд ч МАХН-ынхан гэдэг хэсэг бий. Тэдэнд улс төрийн ганцхан зорилго бий. Тэр нь намын дарга Н.Энхбаярыгаа суллуулах. Энэ зорилгынхоо төлөө олон муухай үйлдэл хийсэн. Юуны өмнө угшил гарал нэг МАН-ынхныг мөн ч их чадаж байгаа.

Сайн ч, муу ч МАН-тайгаа ойр явсан бол хэн хэнд нь хэрэгтэй байсан юм. Эцэстээ МАН-даа эргэж очих нэр нүүргүй л болж байх шиг. МАН-ынхан удаа дараа ялагдаад хэцүү байгаа ч гэсэн том хүчин учир инерцээрээ босч таарна. Харин МАХН-ны ирээдүй улам бүр л хумигдах боллоо.

Өнгөрсөн сонгуулиар Н.Удвалыг нэр дэвшүүлэх хэрэггүй л байсан. Учир нь АН-ынхан Н.Удвалыг дэвшүүлсэн тохирооноосоо буцаж эхэлсэн бололтой. Тэр тохироо нь юу байсан гэдэг иргэн бүрт л сонин сонсогдоно. Тийм учраас л УИХ-ын гишүүн О.Баасанхүү “Ц.Элбэгдорж хэлсэндээ хүрч эр хүн шиг байгаасай гэж манай нам хүлээж байгаа” хэмээн зарлах болов. УИХ-ын эрхэм гишүүн яагаад ингэж мэдэгдэх болов. АН-ынхан МАХН-ынханд юу амласан бэ? Бас юу хэлсэн бэ? Тэгээд яагаад хэлсэндээ хүрэхээ байчихав аа? МАХН-ынхан юуг хүлээгээд байгаа юм бэ? гэх мэт анхаарал татах олон асуулт О.Баасанхүүгийн мэдэгдэлээс урган гарч байна.

О.Баасанхүү гишүүн ингэж далд утгатай улсын ерөнхийлөгчийг шантаажлаад ч байгаа юм шиг битүү хатуу утгатай юм ярьж явахаар шууд хэлэх гэснээ хэлчихвэл ямар вэ? Магадгүй энэ нь ч дээр байж мэднэ.

УИХ-ын гишүүн О.Баасанхүүг ийм мэдэгдэл хийгээд удаагүй байхад АТГ-ынхан Н.Энхбаярын эхнэр О.Цолмонгоос байцаалт авав. Бас хамаатных нь хүүхдийг аавынд хийчихэв. Н.Энхбаярын гэрийг битүүмжлэв. Н.Энхбаярын худуудын гэрийг ч битүүмжлэв. Арай Засагт хамтарч байгаа АН-ынхан нь иймэрхүү амлалтыг МАХН-ынханд өгсөн юм биш байгаа. Түүнийг нь О.Баасанхүү гишүүн сануулсан юм биш биз гэсэн этгээд асуулт урган гарч ирлээ.

Үүнээс өмнө ЭМ-ийн сайд Н.Удвал Ерөнхийлөгч асан Н.Энхбаярын бие тун тааруу байгаа тухай мэдээлэл хийгээд ердөө гуравхан хонож байна. Бас МАХН-ынхан Д.Тэрбишдагва. Г.Шийлэгдамба хоёрыгоо ажлаас нь чөлөөлөхөөр тэмцээд хоёр хонов. Гэтэл Засагт хамтарч байгаа АН-ынхан нь даргынх нь гэр бүлийг дахин оролдож эхэллээ. Энэ байдлаас харвал Засагт хамтарсан МАХН-ынхан өөрсдөө АН-ынхантай хамтарч даргынхаа гэр бүлийг шалгуулах ажилд оролцоод ч байгаа юм шиг ойлгогдохоор болов. Хэрэв тийм биш бол Засгаас гарч байгаад тэмцэж болно доо. Гэтэл тэд Засгаас гарах тун дургүй байна. Тэдний энэ албан тушаалд амиа ч өгөхөөс буцахгүй зан дээр хамтрагчид нь уран нүүдэл хийж бэрс гаргаж эхлэв. Энэ бүхний эцэст МАХН-ынхан бүгдээрээ л хэн ч биш болж байна даа. Хамтарч Засаг барьж байгаа АН-даа нэргүй, гарал угшил нэгтэй МАН-даа нүүргүй. Ингээд МАХН-ынхан улс төрийн золиос болж эхэлжээ.