Монгол, Оросын хамтарсан “Эрдэнэт” үйлдвэрийн захирал асан Ч.Ганзоригийг АТГ болон цагдаагийнхан хамтран баривчилсан юм байна. Гэхдээ маш чимээгүй хэд хоногийн өмнө энэ ажиллагааг явуулжээ. Харин өчигдөр орой Н.Энхбаярын эхнэрийг баривчлах гэсэн дуулианаар энэ асуудал гэр цохиулжээ.
    Ч.Ганзоригийг ямар асуудлаар баривчилсан нь тодорхойгүй. Гэхдээ Ерөнхийлөгчийн сонгуулийн өмнө АН-ынхан бүлгийн хуралаараа хэлэлцээд нэгэн онцгой шийдвэр гаргасан. Тэр нь “Эрдэнэт” үйлдвэрт шалгалт оруулах тухай байсан юм. Тэгээд нилээд өргөн хэмжээтэй ажлын хэсэг гаргаад олон “но”-той асуудал илэрсэн сураг бий. “Эрдэнэт” үйлдвэрийн асуудлыг бусад авлигал шиг ил цагаан зарлаад байх нь зохимж муутай. Учир нь энэ үйлдвэрийн цаана хоёр орны харилцааны асуудал бий. Тиймээс хуулийнхан болгоомжтой харилцахын зэрэгцээ Оросуудтай хамтарч байгаа сураг гарлаа.
    Мөн “Эрдэнэт” үйлдвэрт хийсэн шалгалтын дүнг олон нийтэд зарлана, зарлахгүй гэдэг дээр хуулийнхан хоёр хуваагдсан гэж эх сурвалж мэдээллээ. Тиймээс өнөөг хүртэл шалгалтын дүнгийн талаар олон нийт ямар ч мэдээлэлгүй байна. Энэ дүнг зарлах эсэхээ Орос ах нараасаа асуух хэрэг бас гарах байх. 

    ГОK-ийн захирал асан Ч.Ганзоригийг яг ямар асуудлаар шалгаж эхэлсэн нь бүрхэг байна. Зарим эх сурвалжийн мэдээллээр бол “Эрдэнэт” үйлдвэр нэгэн хувийн аж ахуйн нэгжид баталгаа гаргаж ихээхэн хэмжээний мөнгөний зээл авахуулсан. Үүнтэй холбогдуулан шалгаж байгаа гэж хардах хүмүүс байна. Хэрэв энэ үнэн бол уг асуудалд Ерөнхий сайд Н.Алтанхуяг холбогдож мэдэх юм. Учир нь Н.Алтанхуягийг Ерөнхий сайд болсноос хойш ийм зээл авсан байдаг гэж УИХ-ын гишүүн Ц.Нямдорж мэдэгдсэн удаатай. Хэрэв эдгээр мэдээлэл үнэн бол АН-ынхан Засгийн тэргүүнээрээ оролдож эхэллээ гэсэн үг юм. Мэдээж тийм зээлийг Засгийн тэргүүний зөвшөөрөлгүй авахуулна гэж байхгүй.
    Харин Ч.Ганзоригийг өөр асуудалтай холбогдуулан шалгаж байгаа бол У.Хүрэлсүх холбогдож магадгүй гэж эх сурвалж тайлбарлав. Учир нь өмнөх Засгийн үеийн томоохон шахаа болоод Эрдэнэтийг тойрсон гол томилгоог У.Хүрэлсүхийн санаачилга, оролцоотойгоор хийсэн гэж яригддаг аж. Юутай ч гэсэн Ч.Ганзориг бүх асуудлыг өөр дээрээ тохоод гарахгүй нь тодорхой байх. Тиймээс олон хүнийг Эрдэнэтийн асуудалтай холбогдуулан шалгаж мэдэхээр боллоо.