Нийслэлийн Засаг даргаар ажиллаж байхдаа “Өргөө” зочид буудал, “Улаанбаатар таймс” сонины байрыг хувьчлах захирамж гаргаж байсан учир уг барилгуудыг хууль бусаар өмчилсөн хэрэгт буруутгагдаад байгаа Т.Билэгт  15 хоногийн өмнө эх орондоо ирсэн. Гэвч түүнийг эх орондоо ирэнгүүт нь  цагдан хорьсон.  Учир нь Т.Билэгтийг олон улсын Интерполоор хүртэл хайж байсан юм. Гэвч тэрбээр АНУ-д хүнд хагалгаанд орж, бие нь муу байгаа гэж өөрийн биет төлөөлөгчөөр мэдүүлж байсан удаатай.  Харин ирсэнийх нь дараа түүний биед ямар ч хагалгааны сорив байхгүй байсан талаар эх сурвалжууд мэдээлж байсан. Гэвч  14 хоног байцаагаад батлан даалтад гаргалаа. Гадуур байцаах болсон нь түүний биеийн байдалтай холбоотой гэнэ.  Хамгийн гол Т.Билэгтийг Н.Энхбаярын гэр,  ажил, худ, аавынд нь нэгжлэг хийсний дараа ийнхүү батлан даалтад гаргасан нь хүмүүүсийн сонирхолыг татаад байна.

Тодруулбал, өнгөрсөн Лхагва гарагт МАХН-ын дарга Н.Энхбаярын гэрт болон ажлын байранд нь нэгжлэг хийж, эд хөрөнгийг нь битүүмжилсэн. Мөн худынд нь нэгжлэг хийж худ болох С.Төмөрийн эхнэр П.Даариймаагийн иргэний үнэмлэхний хуулбарыг авсан гэх. Түүнчлэн Энхбаярын аав Намбарынд гэнэтийн нэгжлэг хийсэн. Энэ мэт олон шуугианы дараа Т.Билэгтийг сулласан юм.

Улмаар Энхбаярын аавынх нь бие өчигдөр муудаж,  зүрхний хэм алдагдаж, цусны даралтад эрс өөрчлөлт гарсанаас  болж Сайд нарын  хоёрдугаар эмнэлэгт хүргэгдсэн. Тэгэхээр Н.Энхбаяр аавтайгаа нэг эмнэлэгт байгаа бөгөөд аавынхаа бие муудаж ирсэнийг ч мэдсэн байна. Улмаар уулзах гэтэл Прокурорын зөвшөөрөлгүй бол уулзуулахгүй гээд уулзуулаагүй аж.  Тиймээс Н.Энхбаяр ихэд бухимдалтай байгаа сурагтай. Бухимдсанаас болоод Н.Энхбаярын бие ч муудсан талаар эх сурвалж мэдээллээ.  Одоогоор аавынх нь биеийн байдал муу хэвээрээ байна.