МУ-ын Ерөнхийлөгч Н.Энхбаяр улс орондоо олон сайн зүйлийг хийж бүтээсний зэрэгцээ зарим муу зүйлийн эхлэлийг тавьжээ. Тэрхүү зарим муу зүйлийн нэг нь авлигал юм. Түүнийг авлигалын хэрэгээр ялласан. Ялаа эдлээд жил гаран болж байна. Харин суллагдахад тун бага хугацаа үлдсэн. Гэсэн хэдий ч намынх нь нөхөд түүнийг суллуулахаар бас цагаатгахаар элдэв арга сэдэж ирсэн. Тэр ч бүү хэл түүнийг авлигалын хэрэг хийгээгүй улс төрийн хоригдол хэмээн нэрлэх болсон.
Сонирхолтой нь эрх баригчид Н.Энхбаярт санаанд оромгүй бэлэг бэлдэж эхэлсэн гэж эх сурвалж мэдээллээ. Учир нь саяхан АНУ-аас баригдаж ирсэн Т.Билэгт нилээд зүйлийг ярьсан бололтой юм. Тиймээс АТГ-ынхан нэгэн зэрэг Н.Энхбаярын гэр бүлийнхний таван газарт зэрэг нэгжлэг хийжээ. Тэрхүү таван газар нь Н.Энхбаярын гэр, аав Намбарын гэр, худ С.Төмөрийн гэр, эхнэр О.Цолмонгийн дүүгийнх гэх мэтээр яригдаж байгаа. Харин АТГ-ынхан яг хаана хэнийд нэгжлэг хийсэн, бас юуг баталгаажуулсан талаараа байр сууриа илэрхийлээгүй. Зарим гэрүүдээс нь тодорхой бичиг баримтуудыг авч явжээ. Энэ бүхэн Н.Энхбаярт хэргийн зүйл ангийг нэмэх гэж байгаа нэгэн шалтгаан болжээ.
Тэгээд ч өмнө Н.Энхбаярыг цөөхөн хэрэгт холбогдуулан ялласан. МИАТ-аар үнэгүй ном тээвэрлэсэн, Эрдэнэтэд ган бөмбөлөг нийлүүлсэн гэх мэт. Үүнээс гадна томоохон хэрэгүүдийг нь тусгаарлан шалгах ёстой гэж үзээд эзэн холбогдогчдыг хайж эхэлсэн. Интерполоор эрэн сурвалжлагдаж байсан хүмүүсээс Т.Билэгт л ирсэн. Харин Н.Энхтуяа, Б.Хуяг хоёр олдохгүй байгаа. Эдгээр хүмүүстэй холбоотой хэрэгийг хуулийнхан нягтлан эцэслэх ёстой гэж шалгаж ирсэн. Тиймээс Н.Энхбаярын хэрэг нэмэгдэх магадал өндөрсөж эхэлсэн гэж яригдаж эхэлжээ.
Хэрэв үнэн бол Н.Энхбаярын өмнөх ял дуусах дөхөөд ирэхээр дараагийнх нь шинэ ял нэмэгдэх магадлалтай болжээ. Ингэснээр Н.Энхбаярын авлигал, хээл хахуулын дахин нэг шинэ дуулиан дэгдэж ирэх өдрүүдийн улс төр халуухан болохоор шийдлээ. Үр дүнд нь Н.Энхбаяр ялаа хөнгөлж, цагаадах биш нэмэгдүүлэх шинжтэй болчихлоо.
Сэтгэгдэл (24)