МАН-ын шинэчлэл олон хүний анхаарлыг татаж байна. Ард түмэн, жирийн гишүүдээс эхлээд АН-ынхан хүртэл өрсөлдөгчдөө шинэчлэгдэж өөрчлөгдөх нь Монгол орны цаашдын хөгжилд хэрэгтэй гэж үзэх болов. Тиймээс хэвлэл мэдээллийн хэрэгслүүд МАН-ын шинэчлэлийг тойрсон асуудлыг тогтмол онцолж ирэв.

   Хамгийн харамсалтай нь энэ намын удирдлагууд шинэчлэгдэхийг огтхон ч хүсэхгүй байна. Тиймээс шинэчлэлийн үйл явцаа олон түмэнд ойлгуулах талаар огтхон ч шийдвэртэй алхам хийхгүй нь. Бас МАН-ын удирдлага, лидерүүд нь “шинэчлэл” гэдэг үгийг хэрхэн ойлгодог нь анхаарал татаж эхлэв. Одоогийн удирдлагуудын хандлагаас харвал “шинэчлэл” гэдэг үг тэдний хувьд аргалж байгаад албан тушаалдаа үлдэх бололтой. Харин нэгэн цагт МАН-ыг удирдаж ирсэн М.Энхболд, У.Хүрэлсүх хоёрын хувьд ч “шинэчлэл” гэдэг нь өөрсдийгөө дарга болгоход зориулагдсан ойлголт гэж андуураад эхэлжээ.

   МАН-ынхан саяхан шинэчлэл хийнэ гэж гарч ирсэн залуусаа ихээхэн басч, Б.Даш-Ёндон даргаараа дамжуулан “ангаахай, дэгдээхий”, “борвиндоо баастай” гэх мэтээр цоллуулж унтраасан юм. Овоо дажгүй гарч ирсэн залуус ахмадууддаа ингэж дарагдаад сураг алдрав.

   Харин энэ хооронд МАН-ын дараагийн дарга буюу шинэчлэлийн төлөө хоёр том бүлэглэл хүчтэй ажиллаж байгаа гэж эх сурвалж мэдээллээ. Нэг нь М.Энхболдын тэргүүлдэг Хотын бүлэглэл. Нөгөө нь У.Хүрэлсүхийн толгойлдог Зүүний хүчний холбооныхон. Өөрөөр хэлбэл М.Энхболд, У.Хүрэлсүх хоёрын хэн нэг нь МАН-ын дарга болно. Энэ нь МАН-ын шинэчлэл гэнэ.

    Гэхдээ М.Энхболд дарга болох магадлал нь илүү өндөр аж. Тэрээр одоогийн дарга Ө.Энхтүвшингээр дамжуулан өөрийн хүмүүсээ шинэчлэлийн гэх Их хурлыг бэлтгэх ажлын хэсэгт оруулахаар тохирчихсон сурагтай. Тэгэхээр шинэчлэлийн гэх Их хурлын жорыг хутгаж, дэгийг дэглэх хүмүүсийн ихэнх нь М.Энхболдынх байх гэнэ. Ингээд М.Энхболд дарга болох эхний алхмаа хийжээ. Мөн М.Энхболд Улаанбаатар хотын МАН-ын хорооны даргаараа Ц.Сандуй гэх эрийг томилуулсан. Тэгээд Ц.Сандуйгаараа дамжуулан Сонгинохайрханаас бусад дүүргийн намын хороог авчихжээ. С.Баяр, Сү.Батболд хоёрын Сүхбаатар дүүргийн намын хороог ч булааж хотын бүлэглэлд өөрийн хүнээ тавьж чаджээ. Өөрөөр хэлбэл С.Баяр, Сү.Батболд хоёртой ингэж харьцаж чадаж байгаа Хотын бүлэглэл бусдыг нь бол яаж ч базсан чадна гэсэн үг юм. Ингээд Улаанбаатарт олонхи болсон хотын бүлэглэл дараагийн Их хурлын төлөөлөгчдийг өөрсдийн намын хорооныхоо хүмүүсийн санаачилгаар томилно гэсэн үг. Тэд намын даргаа сонгоход гар өргөнө. Улаанбаатарынхан М.Энхболдыгоо дэмжинэ. Ингээд М.Энхболд МАН-ын дарга болох хоёр дахь алхмаа баталгаажуулчихжээ.

Одоогийн Бага хурал татан буугдаж шинэ Их хурлаас дахин байгуулагдана. Шинэ их хурлын ихэнх нь М.Энхболдын хүмүүс учир хотын Бага хурлын гишүүд ч бас түүнийх байна. Бага хурал нь МАН-ын даргаас бусад албан тушаалтнуудыг томилох эрхтэй. Олонхийн саналаараа. Ингээд тооцоод үзвэл бас л М.Энхболдын хүмүүс энэ намын ерөнхий нарийнаас эхлээд бүхий л нарийн бичиг, газар хэлтсийн дарга болно. М.Энхболд ингэж гурав дахь нүүдлээ баталгаажуулсан байна. Тэр бүхий л хамгаалалтаа хийж чаджээ.

Харин У.Хүрэлсүх хичээж байгаа ч хүч нь их тарамджээ. Өөрөө гадаадад байгаа. Зарим залуус нь гадаадад сурахаар одсон. Бас зарим нь түүнээс нүүр буруулж үгэнд нь орохоо байжээ. Ингээд санаа байв ч сачий дутна гэдэг болов. С.Баяр, Сү.Батболд хоёр дараагийн намын удирдлагад шунахгүй байгаа учир анхаарлаа хандуулахгүй амарч яваа гэнэ. Харин одоогийн дарга Ө.Энхтүвшин Хотын бүлэглэлийн талд үйлчилж байгаа аж. МАН доторх шинэчлэлийн үйл явц ингэж өрнөж байна.
Энэ байдлаас дүгнэж үзвэл МАН-д ямар ч шинэчлэл хийгдэхгүй нь. М.Энхболд МАН-ын дарга болж Хотын бүлэглэлийнхэн шинэчлэлийн гэх Их, Бага хурлын зохиолыг бичиж, жорыг найруулаад бүх зүйлийг дуусгах нь тодорхой болжээ.