Гурван сонгуульд дараалан ялагдсан МАН-ыг шинэчлэх зорилготой "Шинэчилье" хөдөлгөөнийхөн намын удирдлагуудын зөвшөөрөлгүй Бага хурлыг хуралдуулна гэжээ. Бага хурлын гишүүдийн гуравны нэгийн саналаар хурлыг зарлах нь зүйтэй гэж үзсэн байна. "Намын удаа дараагийн ялагдалд удирдлагууд хариуцлага хүлээх ёстой, авлигалын хэрэгт холбоотой хүмүүсийг хөөнө" гэх зэрэг томчуудын хувьд халгаатай зорилго бүхий Бага хуралд МАН-ын томчууд бэлдэхэд багагүй хугацаа хэрэгтэй байгаа бололтой. Тиймээс хурлыг яаран товлохгүй байгаа нь ойлгомжтой юм. Албан тушаал горилж байгаа гэх хэл аманд өртсөн Шинэчлэлийн хорооны залуус МАН-ыг шинэчлэх бодлогын "Найман шинэчлэл" хөтөлбөрийг гаргажээ. Энэ найман асуудал удахгүй болох Бага хурлын халуун сэдвүүд болох нь. Үүнд,

1. Хуйвалдаанаас татгалзаж, бүлэглэлүүдийг ил болгоё.
2. Намын даргыг дарга нар бус гишүүд сонгодог болгоё.
3. Гишүүнчлэлийг шинэчлэн бүртгэж, чанартай нам болцгооё.
4. Санхүүжилтийг ил болгож, зарцуулсан зардал, хөрөнгөө зарлая.
5. Авлига, гэмт хэрэгт өртсөн гишүүдээ зарлаж, хариуцлага тооцъё.
6.Сонгуульд ялагдсан намын бүх шатны удирдлагад хариуцлага тооцъё.
7. Гишүүдийн оролцоог бүх шатанд хангаж, нээлттэй нам болъё.
8. Намын боловсон хүчнийг татагдаж дээшилдэг бус, хөдөлмөрлөж дэвшдэг болгоё гэжээ. Энэ хөтөлбөр нь Шинэчлэлийн хорооныхон намынхаа болж, бүтэхгүй байгаа асуудлыг хэрхэн харж байгааг илтгэж байна. Намын удирдлагууд, авлига, гэмт хэрэгт холбогдсон гишүүдээ явуулах асуудал энэ хөтөлбөрийн гол сэдэв байх аж. Бага хурал дээр ч ширүүн яригдах бололтой. МАН-ын удирдлагууд тэдний саналыг Бага хурал дээр хэрхэн хүлээж авах нь хамгийн ихээр сонирхол татаж байна. "Найман шинэчлэл" хөтөлбөр хурлын өмнөх шоу болоод дуусах уу, эсвэл үнэхээр хаалттай намыг шинэчилж чадах уу гэдэг асуулт хариултаа хүлээж байгаа юм. Учир нь Шинэчлэлийн хорооны залуус тун идэвхитэй байгаа ч намын удирдлагуудын түвшинд "Жингийн цуваа явж л байдаг, жингэр нохой хуцаж л байдаг" гэдэг шиг хээв нэг сууж байгаа хүн олон байна.