Хууль зүйн сайд Х.Тэмүүжин энэ сарын 22-нд Цагдаагийн ерөнхий газрын тэргүүн дэд дарга, хурандаа Ш.Ганболдыг үүрэгт ажлаас нь чөлөөлсөн. Харин түүний оронд Сэлэнгэ аймгийн Цагдаагийн газрын дарга хурандаа С.Баатаржавыг томилсон байна. Х.Тэмүүжин сайд ийм шийдвэр гаргах болсон шалтгаан нь мөрдөн байцаалтад ашиглах зорилгоор БНХАУ-аас оруулж ирсэн 400 ширхэг “гяндан” сандалтай холбоотой юм.

Тодруулбал 2012 онд ЦЕГ-ын дарга асан Д.Сандаг-Очир эрүү шүүлтэд зориулсан 400 ширхэг сандлыг 626.000 мянган юаниар Хятадаас  худалдан авчээ. Харин Шинэчлэлийн Засгийн газар байгуулагдсаны дараа буюу 2012 оны арваннэгдүгээр сард ЦЕГ-ын дэд дарга Б.Билэгт тушаал гаргаж "гяндан" сандлыг төв орон нутгийн цагдаагийн бүх хэлтэс, тасгуудад хуваарь гарган тараасан байдаг.

Энэ тухай мэдээлэл ил болсны дараа Хууль зүйн сайд Х.Тэмүүжин “уг сандлыг буцаан татах үүргийг ЦЕГ-т өгсөн” хэмээн мэдээлж байсан ч цагдаагийн одоогийн удирдлагууд харин ч эсрэгээрээ, тусгай журам гарган уг сандлыг ашиглахаар прокурорын байгууллагад санал хүргүүлээд байгаа гэх мэдээлэл тараад байгаа. Тиймээс Хууль зүйн сайд энэ удаа ЦЕГ-ын удирдлагуудад хариуцлага тооцож эхэлсэн нь энэ аж.