Энэ Засгийн газрын ч, АН-ын ч “толгойны өвчин” бол МАХН байсаар ирсэн. Тэд олон удаа Засгаас гарна гэж айлгадаг болсон. Бас Н.Энхбаярыг суллах төдийгүй цагаатгахыг шаардаж төрийг ч рекетэлж эхэлсэн. Гуравдахь хүчин гэсэн суудлаа үнэ хүргэж олон албан тушаалд өөрсдийн ах дүүсээ шахаж байршуулсан. Иймэрхүү байдалдаа эрдэж угшил гарал нэгтэй МАН, хамтарч сонгуульд орсон МҮАН-ыг ч бассан олон удаагийн үйлдлийг үзүүлсэн. 

Өөрөөр хэлбэл, МАХН эрх баригчдын төдийгүй сөрөг хүчний ч бухимдлыг төрүүлж сагаж ирсэн. Олон удаа чадуулсан эрх баригчид тэдэнд “өдрийн сайныг өнжин хүлээж, сарын сайныг саатан хүлээж” гэдэг шиг “аятайхан бэлэг” бэлдсэн сураг гарлаа. АН-ынхан МАН-ын гишүүдийг авлигалын асуудлаар нь шалгаж ээлж дараалан “аавынх” руу дуудах болсон. Тэгвэл тэр ээлж МАХН-ынхан дээр иржээ. Юуны өмнө У.Барсболдыг шалгах гэтэл МАХН-ынхан түүнийг намаасаа хөөчихжээ. Харин энэ удаа Сангийн сайд Ч.Улаан, Эдийн засгийн яамны дэд сайд О.Чулуунбат нарыг АТГ-ынхан сонирхож эхэлсэн сураг гарлаа.

Энэ хоёр эрхмийн асуудал олон жилийн өмнөөс яригдаж ирсэн. Тухайлбал Ч.Улаан сангийн сайд байхдаа гаалийн гэгдэх Х.Баатарын хэргээр баригдангаа алдаад үлдсэн юм. Хүмүүс Х.Баатарыг биш Ч.Улааныг шалгах ёстой гэж үздэг. Бас Ч.Улааныг Сүхбаатар аймаг дахь Цайртминералтай холбон шалгах тодорхой сэжүүрүүд бий гэж яригддаг. Энэ мэт батлагдаагүй олон яриаг батлахаар араас нь АТГ-ынхан орчихсон сураг байна.

“Тунгалаг тамир” романд Итгэлт баян “Манай хошууны булхайг ухвал барагдахгүй их юм бий” гэж гардаг шиг О.Чулуунбатын булхайг ухвал ёстой барагдахгүй их юм гарна. Монгол Улсын Ерөнхий сайд асан Д.Бямбасүрэнгийн нотолж ярьсан алт дилерийн хэргээс эхлээд хамгийн сүүлд АНУ-ын иргэн Ж.Чалмерстай хамтран мөнгө угаасан гээд дуусахгүй олон зүйл яригдана. Энэ бүхнээс О.Чулуунбат мултарсаар ирсэн. Харин энэ удаа АН-ынхан нилээд лав бариад авчихжээ.

Нөхцөл байдал ингэж эргэж эхэлсэн учир Ч.Улаан, О.Чулуунбат хоёр “Арвиндах” арга замыг сонгох талаар хэлэлцэж эхэлсэн сураг гарлаа. Тэд АН-д орж албатайгаа үлдэх тухай хэлэлцсэн яриа нам гүмхэн болсон шаргал орноос гарлаа. Ийм нүүдэл хийж эхэлсэн нь ортой. Учир нь Ч.Улаан, О.Чулуунбат хоёр сүүлийн саруудад Н.Энхбаяр даргынхаа эхнэрээс зугтах болсон. Бас энэ хоёр эрхэм даргыгаа эргэхээ байсан гэж намынх нь гишүүд шүүмжилж эхэлжээ. Эдгээр хандлагууд нь хоёр сайдын зам шуударч байгааг илтгэнэ. Хэрэв энэ хоёр сайд АН-д орчихвол МАХН-ын байдал улам л хүндэрнэ.

Мөн МАХН-ын Ерөнхий нарийн бичгийн дарга Г.Шийлэгдамбыг ч гэсэн Богд уулын газартай холбогдуулан шалгах ажил эхэлсэн сураг гарлаа. Энэ мэтээр МАХН-ынхыг бутаргах төлөвлөгөө аль хэдийнээ эхэлжээ.

Д.Тэрбишдагва л эрийн шийр зааж байгаа гэж эх сурвалж мэдээллээ. Түүнийг АН-д элсэж болох тухай санал гаргасан нэгний өмнөөс салаавч үзүүлсэн тухай мэдээлэл ирэв. Одоохондоо хамтрагч намынхаа удирдлагад хэн ийм санал тавьсан нь тодорхойгүй. Өнгөрсөн Ерөнхийлөгчийн сонгуулийн үеэр Д.Тэрбишдагва өөрийнхөө нэр дэвшигчийг биш МАН-ынхныг ил далдаар дэмжсэн. Үүнийгээ ч нотолж сонгуулийн төгсгөлд штабаа удирдахаасаа сайн дураараа татгалзсан юм.

Г.Шийлэгдамбыг шалгаж, Ч.Улаан, О.Чулуунбат хоёрыг АН-д элсүүлж, Д.Тэрбишдагвыг ганцаардуулж дөнгөвөл цаана нь байгаа О.Баасанхүү, З.Баянсэлэнгэ мэтийнхэнийг тоох хүн ховор. Ингээд гарал нэгтэй МАН-аа чадах гэсэн нөхдүүд өөрсдөө бас чадагдаад дуусах шинжтэй болжээ.