МАН 92 жилийн баялаг түүхтэй. Түүнийхээ бараг 80 гаруй жилд нь төрийг удирдсан. Ийм нам сүүлийн таван жил сонгуульд ялагдал хүлээж эцэстээ тогныхоо мөнгийг төлж чадахаа байсан гэж “Шинэчлэе” хөдөлгөөнийх нь залуус зарлаж явна.

МАН-ыг тогныхоо мөнгийг төлж чадахаа байсан гэдэгт хэн ч итгэхгүй. Энэ нам олон сонгуульд дараалж ялагдаад ядарч туйлдсан байж болно. Гэхдээ тогныхоо мөнгийг төлж чадахгүйдээ арай ч хүрээгүй байхаа.

Эх сурвалжийн мэдээлж байгаагаар бол МАН-ын Удирдах зөвлөл түр хугацаанд амарсан юм байна. Тиймээс намын гол аппаратынхан дагаад амарч байгаа аж. Мөн МАН-ын зарим удирдлага БНАСУ-д айлчлал хийж яваа гэнэ. Чоно борооноор гэдэг шиг ийм үеийг нь ашиглаад МАН-ын яруу алдарт шинэ үеийнхэн намаа болоод ахмадуудаа гутаах ажлаа үргэлжлүүлж явна. Тэд намын байр тоггүй болсон, намын байранд ажиллаж байгаа хүн алга, тогныхоо мөнгийг төлж чадахаа байсан, дарга нараа хайж байгаа тухай зарыг цахим ертөнцөд зарлаж сууна. Тухайлбал “Ө.Энхтүвшин, Г.Занданшатар, Ш.Раднаасэд нарыг харсан үзсэн хүн байвал МАН-ын “Шинэчлэлийн хороо”-нд олж өгч тусална уу? Цааш нь ДЖ”, “Манай нам Клиник үхэлд орчоод байхад хөлдүү дарга нар нь амиа бодоод зугтаачих юм. Намын байрны баруун жигүүр тэр чигтээ тоггүй болжээ…”, “Өрөөгөө ашиглахгүй байгаа дарга нарын өрөөг түрүүслэж намынхаа тогны мөнгийг төлж намын аппаратыг Бага хуралд бэлдэх боломжийг хангах юмсан” гэх мэтээр дуу дуугаа авалцан жиргэх юм. Нэг нь нөгөөгийнхөө жиргээг тун ч хурдан шуурхай дамжуулах аж.

МАН-ын шинэ үе ийм ёс зүйгүй гэж бодохоор ой гутах шиг санагдах юм. Тэд албан тушаалд хүрэхийн тулд намынхаа нэр хүндийг юман чинээ бодохгүй байна. Бас дарга нараа хүн ч гэж тоохгүй орилж явна. Ийм хүмүүс ард түмнийг хүндэтгэх үү? Намынхаа эгэл жирийн гишүүдийн дэмжлэгийг авч чадах уу? Тэгээд бас шинэчлэлийг хийлээ юу? Удирдлагуудынхаа, намынхаа нэр хүндийг унагаах шинэчлэл хийж байгаагаа өөрсдөө ч ойлгохгүй яваа бололтой.

Уг нь шинэчлэл хийх гэж байгаа хүмүүс бодлогоо уралдуулах ёстой л доо. Ийм байх ёстой хүмүүс намынхан ажлаа хийхгүй амарчихлаа, намын байр харанхуй байна, тогныхоо мөнгийг төлөөгүй гэх мэт утгагүй хов жив ярьж яваа “Шинэчлэе” хөдөлгөөнийхөн итгэл төрүүлэхгүй байна. Намын дарга нар утсаа салгаад олдохгүй байна, биднээс зугтлаа гэх мэт гомдлууд нь тэднийг аргагүй хүүхдээрээ байгааг илтгэнэ. У.Хүрэлсүхийн залуусын увиагүй энэ үйлдэл намын гишүүдийнхээ дэмжлэгийг хүлээх биш бухимдлыг л төрүүлэхээр болоод явчихлаа.

“Хэтэрхий их хүсээд байгаа хүмүүст албыг битгий өг” гэсэн эртний үг бий. Намын удирдлагыг авахын тулд дарга нараасаа эхлээд эгэл жирийн гишүүдээ хүртэл юман чинээ бодохгүй хүмүүст итгэх хэцүү л дээ. Тэд намаа бүр уруудуулах ажил хийнэ үү гэхээс өөд нь татах санаачилга гаргаж байгаа юм алга.
Ингэж “Шинэчлэе” хөдөлгөөнийхөн МАН-аа үйл ажиллагаа явуулахгүй, гэрэл цахилгаангүй болсон, түүнийгээ төлөх мөнгөгүйг олон түмэнд зарлаж явна. МАН-ын шинэчлэгч залуусын мөн чанар ийм юм. Харин удирдлагууд нь удахгүй өөр сонирхолтой тайлбар хийх биз дээ.