Засгийн газрын сайдууд амраад бараг 10 хонолоо. Дахиад амралт нь ийм хугацаагаар үргэлжилнэ гэж эх сурвалж мэдээлэв. Зарим хүмүүсийн ярьж байгаагаар бол Монголын Засгийн газар бүрэн бүрэлдэхүүнээрээ ийм хугацаанд амарч байсан түүхгүй гэнэ.

Засгийн газрын тэргүүнийг дагаад бүх сайдууд нь амарсан. Харин Шадар сайд, дэд сайд нар ажиллаж байгаа гэж албаныхан ам таглах болов. Итгэл өгөөгүй Шадар сайд, эрх мэдэлгүй билэгдэлийн дэд сайд нар ажил амжуулж чадах уу? Хэрэв тэд ажил амжуулж байсан Засгийн газрын сайд нарыг амарч байх хооронд ноён долларын үнэ 1420-иос 1525 хүрч өсөх үү? Үүнийг дагаад эдийн засагт үнийн хөөрөгдөл эхлэв. Орон сууцны үнэ талийж өгөв. Чингэс бондын өр улам зузаарч ард түмний нуруун дээрх ачаа нэмэгдэхэд Засгийн газрын сайдууд яаж сайхан амарч чадаж байнаа. Айраг гүзээлж, мах шарж, аймаг сумын ойгоор урилгагүй зочин болцгоож жаргалтай нь аргагүй яваа дуулдах юм.

Харин Засгийн тэргүүн нь залуухан эхнэртэйгээ нуурын хөвөөгөөр нүцгэн шалдан амарч яваагаа хэвлэлээр гаргаж ар түмэндээ гайхуулаастай. Залуу эхнэрийнхээ нүцгэн биеийн гоо сайхныг ард түмэндээ алдаршуулах гэсэн юм болов уу эсвэл амралт ажлыг яаж хослуулдагыг харуулах гэсэн юм болов уу? Алин боловч ойлгомжгүй байна. Ямар ч гэсэн сүүлийн үеийн Ерөнхий сайдуудаас Н.Алтанхуяг шиг өнгөтэй малилзсан хүн алга.
Хамгийн сүүлийн гурван Ерөнхий сайдаар жишээ татаж ярихад Засгийн тэргүүн шиг хэцүү зовлонтой ажил байхгүй нь мэдрэгдэнэ. М.Энхболд гэж будилж мунгинасан амьтан хүний өөрийн хүмүүсийн шахаас дунд ажиллаад эцэстээ эрүүл мэнд нь ихээхэн муудсан гэсэн. С.Баяр угаасаа эрүүл мэнд муудаад ажлаа өгье гэж сайн дураараа өргөдлөө өгөөд явсан. Сү.Батболд ард түмний нүдэн дээр яаж нүднээс гартлаа үрчийснийг олон түмэн мартаагүй байна. Нэгэнтээ Ерөнхий сайд Д.Бямбасүрэн “Ерөнхий сайдын ажил бол яс янгинуулдаг. Шөнө гэртээ ирэхэд яс янгинаж голд ортол өвддөг юм даа. Тийм л хүнд ажил шүү дээ” хэмээн учирласан удаатай. Гэтэл Н.Алтанхуяг сайд маань малилзаад л телевизээр эхнэрээ суулгаж гараад л, бас нуурын хөвөөнд эхнэртэйгээн амарч байгаагаа харуулаад л. Энэ улсад хэн жаргалтай байна вэ? гэвэл Н.Алтанхуяг л гэж хэлмээр харагдаж байна даа.

Түүний амрах зугаалах, залуу эхнэрээрээ гоёх эрхийг буруутгахгүй. Харин амарч, жаргаж явах хойгуур нь ард түмний амьдрал хүндэрч, эдийн засаг уруудаад байгааг хүлээн зөвшөөрч чадахгүй нь.

Наадмын маргааш намар гэж үг бий. Удахгүй өвөл болно. Улаанбаатарын өвөлжилт хүндэрнэ. Ерөнхий сайд маань сурсан зангаараа нүүрсээ шуудайлаад өөрөө тараагаад явах уу? Улаанбаатарын утаагаа шийдэж чадахгүй хэвээрээ байх уу? Хүүхдийн сургууль, цэцэрлэг, өвөлжилт гээд уламжлал асуудлууд хүлээгээстэй. Дээр нь улсын төсөв сүүлийн жилүүдэд анх удаа тасарлаа. Их бүтээн байгуулалт өрнүүлж байгаа л гэх. Ард түмний нэрээр авсан зээлээр юу хийж байгааг ард түмэн нь өөрсдөө сайн мэдэхгүй л сууж байна. Юу хийхээ ард түмнээсээ асуугаагүй шүү дээ. Энэ мэт улс орон түмэн зовлон, мянган бэрхшээл дунд байхад Н.Алтанхуяг шиг ингэж олон хоногоор амраад алга болдог Ерөнхий сайдтай байсныг мэдэх хүн байна уу?