УИХ-ын гишүүн Ё.Отгонбаярын дуулиант хэрэг чимээгүй болсон. Чуулган завсарлаад наадам, найр үргэлжилж байгаа ч гэсэн Ё.Отгонбаярыг шалгах хэрэг завсардаагүй гэж эх сурвалж мэдээллээ.

Харин ч Ё.Отгонбаярын хэргийг нарийвчлан шалгаж эхэлсэн гэнэ. Тухайлбал түүнийг сайд байх үед зарлагдсан бүх тендерийг хуулийнхан судалж байгаа аж. Тийм ч учраас Хууль зүйн сайд Х.Тэмүүжин нэгэнтээ “энэ хэрэгийг удаан хугацаанд шалгах шаардлага гарсан” тухай ам нээсэн удаатай. Олон асуудлыг нарийвчлан үзэхийн зэрэгцээ зарим нэгэн иргэд Ё.Отгонбаярын талаар гомдол мэдүүлж байгаа мэдээлэл ирлээ.

Хэрэв Ё.Отгонбаярын үеийн бүх тендерийг нэг бүрчлэн шалгавал нилээд хугацаа зарцуулна. Учир нь боловсролын салбарт хамгийн их тендер зарлагддаг. Бас манай улсын төсөвийн ихэнхи хэсэг боловсролын салбарт оногддогийг сайдынх нь багцаас одоо ч гэсэн харж болно.

Мөн уг асуудлыг шалгах явцад сөхөгдөж буй зарим сургууль, цэцэрлэгийн тендерүүд нь Ё.Отгонбаяраас гадна өөр хүмүүсийг ч шалгах шинэ нөхцлийг үүсгэж байгаа аж.

Энэ бүх мэдээлэлүүд үнэн болж таарвал Ё.Отгонбаяр Налайхын сургуулийн асуудлаас гадна өөр олон зүйлүүдтэй холбогдож мэдэх болсон байна. Удахгүй намрын ажлуудтай давхцуулан Ё.Отгонбаярын талаар шинэ мэдээлэлүүд ч түгж мэдэх нь тодорхой болжээ. Юутай ч гэсэн түүнийг шалгах ажил илүү нарийвчилсан байдлаар өрнөж байгаа гэнэ.

Үүний зэрэгцээ МАН-ынхан хэдэн сарын дараа Засгийн газрыг огцруулах асуудлаа дахин хөндөнө. Тэр үед шинэчлэгдэж чадахгүй байгаа МАН-д зориулсан сурталчилгааны шинэ стратегийг ч эрх баригчид боловсруулжээ. Тэр нь МАН нийгмийн бүхий л салбарт идэж уусан. Тэр ч бүү хэл боловсролын сайд нь хүртэл хүүхдийн сургууль цэцэрлэгээс хумсалж байсан тухай суртал нэвтрүүлэгийн эх зохиол бичигдэж буй сураг гарлаа. Үр дүнд нь МАН хүүхдийн сурах орчинд хүртэл хуруугаа дүрдэг гэсэн муухай имиджтэй болох бололтой.