Удаан хугацаанд Н.Энхбаярын эрүүл мэндийг тойрсон маргаан өрнөх болсон. Өнөөг болтол түүнийг улс төрийн зорилгоор ялласан гэж үздэг нийгмийн нэг хэсэг бий. Өөрөө ч ийм байр суурийг хатуу баримталдаг. Тиймээс МАХН-ынхан Н.Энхбаярыг “Улс төрийн хоригдол” хэмээн нэрлэх болсон. Мөн МАН-ын олонхи гишүүд Н.Энхбаярыг суллахыг шаардаж ирсэн.

Харин АН-ынхан Н.Энхбаярыг “авлигалын динзавор”, “авлигалын загалмайлсан эцэг” хэмээх элдэв нэр хочийг зүүсэн юм. Тэгвэл өчигдөр АН-ын нөлөө бүхий зүтгэлтэн төдийгүй түшиг тулгуур нь болдог Ерөнхий сайд асан Д.Бямбасүрэн Ерөнхийлөгч асан Н.Энхбаярыг улс төрийн зорилгоор ялласан. Шударга бусаар шүүсэн. Хамаагүй хэрэг тулгаж гүтгэсэн. Тэгээд эрүүл мэндэд анхаарахгүй байгаа нь ардчилсан нийгмийн байж болохгүй алдаа хэмээн хатуухан байр сууриа илэрхийлэв. Түүний Н.Энхбаярыг хэрхэн ялласан талаарх байр суурь ихээхэн дуулиан дагуулахаар болчихлоо. Учир нь Н.Энхбаярыг АН-ын гол хүн улс төрийн зорилгоор ялласан хэмээн зарласан нь энэхүү дуулиант асуудлыг улам ч ээдрээтэй болгочихлоо.
Тэрээр экc Ерөнхийлөгчийг ялласан талаар “Төр иргэнээ буруутгаж эрх чөлөөнд нь халдахдаа туйлын шударга байх ёстой. Гэтэл Н.Энхбаярын тухайд анхнаасаа үүсгэж ялласан таван хэргийн гурав нь одоо хүчингүй болчихсон. Таваас гурав гэдэг чинь төр яллаж байгаа тэр хэргийнхээ 60-70 хувьд нь худал хэлсэн болж таарч байна. Ийм хэргээр хүнийг яллана гэдэг ардчилсан нийгэмд байж болохгүй. Ер нь Н.Энхбаяр гэдэг хүнд хэрэг тулгаж тасалсан  шүүх хурал  Монголын шүүх, засаглал яаж ажилладаг юм бэ гэдэг “анатоми”-ийг зөвхөн монголчуудад төдийгүй дэлхий нийтэд харуулчихсан. Тэр шүүх  хурал үнэхээр энэ хүн гэм буруутай гэж хэнд ч итгэл  үнэмшил төрүүлж чадаагүй. Чадах ч үгүй байсан байх. Ийм байдлаар тэр хүнийг яллаад ял эдлүүлж байна. Н.Энхбаяр гэдэг хүнийг үхрийн бөөр шиг эрээвэр хураавар янз бүрийн асуудлыг цуглуулж дутуу дулимаг шалгасан, нотолсон асуудлаар ялласан явдал нь авлигын эсрэг тэмцэх хэргийн нэр төрийг гутааж, эрчийг нь сааруулж, хориг тавих гэсэн  авлигачдын өөрсдийнх нь хийсэн хэрэг байх гэж боддог” хэмээн ярьсан юм. Түүний энэ ярианаас үзвэл Н.Энхбаярыг яллах санаачилга гаргасан хүмүүсийг шууд улс төрийн зорилго агуулсан гэдгийг илэрхийлж. Бас Шүүх засаглалыг буруу хэргээр хүн ялласан болохыг аятайхан сануулж. Мөн АТГ-ыг ажлаа хийж чадахгүй байгаагаас болоод нэр хүнд нь шалдаа бууж байгааг хэлжээ.

Засгийн тэргүүн байсан хүний хувьд улс төрийн хоригдол хэмээн нэрлэгдээд байгаа Н.Энхбаярын эрүүл мэндэд ихээхэн санаа зовж байгаагаа ч нуугаагүй аж. Тухайлбал “Мэдээллийн хэрэгслээр гарч байгаагаас үзэхэд жин нь 37 кг-аас давж буурсан байна. Молекулын  төвшинд бие организмын хямрал явж байна гэсэн ойлголт төрж байна. Өнгөрсөн жилээс Н.Энхбаярыг Монголд оношилж, эмчилж чадахгүй  юм байна. Гадаадад явуулж эмчлүүлье гэж хэсэг хүн ярилаа. Гэтэл Шүүхийн шийдвэр гүйцэтгэх газрынхан “Өөрөө  өөрийнхөө эрүүл мэндийг доройтуулсан” гэсэн хариу өгдөг юм гэнэ лээ. Энэ үнэхээр үзэшгүй муухай,  харгис бүдүүлэг  хариулт. Шүүх эмнэлгийнхэн өлсгөлөн зарласан хүний эс задардаг гэдгийг яаж нотолж байгаа юм бэ. Энэ чинь бид мэтийн удирдахуйн ухааны ном заалгасан улсад хичээл заахдаа наадах чинь сэтгэхүйн дарамтаас болдог юм, цочролоос үүсч болно, гаднын янз бүрийн шалтгаанаар үүсч болно. Энэ бүхнээс болж үүсвэл  тэр чинь хүний бие организмыг сэхэхгүй болтол доройтуулдаг юм гээд тов тодорхой ойлгуулж ирсэн онол шүү дээ. Ингээд бодоод үзэхэд шүүх засаглалынхан, Шүүхийн шийдвэр гүйцэтгэх газрынхан нөгөө эрүүгийн гэмт хэрэгтэнтэй харьцдаг тэр зангаараа, тэр байдлаараа Н.Энхбаярын эрүүл мэндийг шууд хохироож байна. Тэр Төрийн тэргүүн байсан хүн. Монгол Улс гадныхны гарт төр, засгийн тэргүүнүүдээ алдсан нь цөөдөөгүй. Би 14 дэх Ерөнхий сайд гэхэд 11 нь тийм байдлаар амь үрэгдсэн юм шүү. Гэтэл одоо яаж байна гэвэл, монголчууд Ерөнхий сайд байсан хүнээ өөрсдөө шоронд хийгээд хороочихож гэнэ гэсэн түүх бичүүлэхийн өмнө тулж ирээд байна.  Үүнийгээ ухаарахгүй бол засч болохгүй алдаа болж болох юм” хэмээн ярьсан юм.

Түүний энэ ярианаас дүгнэж үзвэл улс төрийн хоригдлынхоо эрүүл мэндэд анхаарахгүй байгаа нь хүнлэг бус байна. Хэрэв Н.Энхбаярын эрүүл мэндэд ямар нэгэн асуудал үүсвэл буруутнууд нь Шүүхийн шийдвэр гүйцэтгэх газрынхан болохыг олон түмэнд сонордууллаа. Шүүхийн шийдвэр гүйцэтгэх газрынханыг үзэшгүй муухай, харгис хүмүүс гэж бас зарлав. Үнэхээр Н.Энхбаярын эрүүл мэнд амь насанд нь халтай болвол ямар ч байсан хариуцлага хүлээх хүмүүс нь хэн болохыг ойлгуулав. Ардчилсан нийгэмд ардчилсан бус үйлдэл үзүүлж, үг хэлж байгаа Шүүхийн шийдвэр гүйцэтгэх газрынханы олон удаагийн үйлдлийг ард түмэн мартаагүй байгаа. Түүн дээр Ерөнхий сайд асан Д.Бямбасүрэн гал өрдөж орхилоо.
Ийнхүү анх удаагаа АН-ын гол хүн Н.Энхбаярыг улс төрийн зорилгоор ялласныг зарласан нь цаашдаа нэлээд олон үйдлийн эхлэлийг тавчих шиг боллоо доо.