Монгол Ардын Намын “Шинэчилье” нэгдсэн хөдөлгөөнөөс намын гишүүд дэмжигчид, элгэн садан Монголчууд Та бүхнийхээ амар амгаланг эрэн мэндчилье.
Дэлгэр сайхан зуны цагт, алжаалаа тайлахын зэрэгцээ ирэх намар, өвлийн бэлтгэлээ базаадаг нь Монголчуудын амьдралын өвөрмөц хэв маяг бөгөөд  өөрчлөлтөнд зохицож, ирээдүйг төлөвлөдөг нүүдэлчдийн ухаан юм.
Сүүлийн жилүүдэд Монголын улс төр, нийгэм, эдийн засгийн хүрээнд эрчимтэй өөрчлөлт явагдаж байна. Энэ нь Монголчуудын үзэл санаа, хандлага, мэдлэг чадвар, нийгэм эдийн засгийн харилцаанд бий болж байгаа өөрчлөлт юм. Нэгэн ухаантан; “Хорвоо дэлхий дээр өөрчлөгддөггүй цорын ганц зүйл бий, тэр нь өөрчлөлт өөрөө юм.” гэж хэлсэн байдаг.
    Энэ утгаараа МАН-ын “Шинэчилье” нэгдсэн хөдөлгөөнийг улс төр, нийгэм эдийн засгийн өөрчлөлтөнд зохицож, ирээдүйг төлөвлөх зорилгоор үүсгэн байгуулж МАН-ын өмнө тулгамдаж буй асуудлуудыг Та бүхэнтэй ил тод, нээлттэй хэлэлцэж, түүнийг даван туулах арга зам, санал бодлыг сонсохоор энэхүү уриалгыг хүргэж байна.
Монголчуудын үндэсний эрх чөлөө, тусгаар тогтнол, бие даасан байдал, олон улсад хүлээн зөвшөөрөгдөж, НҮБ-ын гишүүн болоход МАН-ын гүйцэтгэсэн түүхэн үүргийг үгүйсгэх аргагүй. МАН нь Монгол Улсын тусгаар тогтнолыг сэргээж, бие даасан бүрэн эрхт байдлыг бататгаж, орчин цагийн боловсрол шинжлэх ухаан, эрүүл мэнд, хөдөө аж ахуй, газар тариалан, уул уурхай, аж үйлдвэрлэлийн салбарын хөгжлийг түүчээлэн, их бүтээн байгуулалтын суурийг тавьж хөгжүүлж ирсэн. 1990 оны ардчилсан хөдөлгөөнийг өлгийдэн авч, шинэ Үндсэн хуулийг баталж, ардчиллын үнэт зүйлийг улс төр, нийгэм, эдийн засгийн бүхий л хүрээнд хөгжүүлэхэд МАН нь санаачлагч, манлайлагч, хэрэгжүүлэгч нь билээ.
Гэвч Монгол Улсын хөгжлийн ачааны хүндийг үүрч ирсэн МАН-ын нэр хүнд, байр суурь сүүлийн жилүүдэд унаж, 2009 оноос хойшхи  таван сонгуульд дараалан ялагдаж, улс төр, нийгмийг манлайлах орон зайгаа алдаж байгаа нь маргашгүй үнэн.

  Ялагдлын шалтгаануудыг тоймловол; МАН засгийн эрхийг дангаар болон бусад улс төрийн хүчинтэй хамтран барьж байх явцад гаргасан бодлого, удирдлага, үйл ажиллагааны алдаа, намын “НИЙГМИЙН АРДЧИЛАЛ” улс төрийн үзэл баримтлал ба түүний ач холбогдол, үр дүнг ард түмний ахуй амьдралд бодит хөгжил, дэвшил болгож чадаагүй, намын дотоод ардчилал, удирдлага зохион байгуулалт, авлига, албан тушаалын зарчимгүй үйлдлүүдтэй хангалттай тэмцээгүй гэх мэт алдаа дутагдлуудаа цаг тухайд нь засч залруулж, нийгмийн хөгжил, хүсэлт шаардлагын дагуу хувьсан шинэчлэгдэж чадаагүйд оршино.

  Эдгээр олон ялагдлууд ирээдүйд ялах олон ялалтын эх үндэс нь байг хэмээн итгэж одоо ч намынхаа шинэчлэл, хөгжил дэвшлийн төлөө санаа зовнин суугаа мянга мянган гишүүдийнхээ их хүлээлтийн буухиаг зүтгэлээр хариулах хариуцлагаа намын гишүүд дор бүрнээ ухаарч, МАН улмаар Монгол Улсын хөгжил дэвшлийн төлөө нэгэн хүчин дор нэгдэх цаг иржээ.

  Шат, шатны сонгуульд ялагдсан ч намын гишүүд дэмжигчдийн итгэл, сэтгэл, урам зориг унтарч байна гэхээсээ илүү чухам цаашдаа хэрхэн зөв, эрүүл зарчмаар урагшлах ёстой вэ? гэсэн асуултын хүрээнд үзэл баримтлал, үйл хөдлөлийн жимийг “Шинэчилье” нэгдсэн хөдөлгөөн ахмад, дунд, залуу гурван үеийн нягт хэлхээ, хамтын ажиллагаанд тулгуурлан эрэлхийлж байна.
  
   Нийгмийн өчүүхэн хэсгийн амьдралыг сайжруулах бус, харин нийтээрээ хөгжих бололцоо олгон эргээд нийтийг нийгмийн хөгжлийг дэмжигч, түүнд идэвхтэй оролцогч болгоход “Нийгмийн Ардчилсан” үзэл баримтлалын зорилго оршдог. МАН нь нийгмийн ардчилсан үзэл баримтлалын ач холбогдлыг ард иргэддээ хүртээхийн төлөө намынхаа шинэчлэлийг гишүүд, дэмжигчдээс асууж, тэдний санал, санаачлага, оролцооны дор хэрэгжүүлэх нь зүйтэй.
Эх орны маань тусгаар тогтнол, эв нэгдэл, эгэл ард түмний амьдрал, нийгмийн ардчиллын үнэт зүйлс МАН-ын шинэчлэлээс хамаарах бөгөөд эрүүл нийгмийг цогцлоон байгуулах, дүр эсгэсэн бус дүрээрээ тодрох нийгмийн ардчиллын төлөө МАН-ын гишүүд, дэмжигчид нэгдэх ёстой.
Суурь нь зөв барилгыг засч сайжруулж болдог. Улс үндэснийхээ ирээдүйн төлөө МАН-ын гишүүд бид нэгдэн нягтарч, алдаа оноогоо хэлэлцэн, ялагдлын шалтгааныг зөв тодорхойлж улмаар шинэчлэлийг шинжлэх ухааны үндэслэлээр, зорилготой, зоригтой, бодитой хэрэгжүүлж чадваас МАН, Монголын улс төр, нийгмийн шинэчлэлд онцгой ач холбогдолтой байх нь дамжиггүй.   
Иймд Та бүхнийг Монгол Ардын Намаа шинэчлэх өрнөлд өөрийн саналаа илгээж, нийгмийг ардчилах үйл явцад бодитой хувь нэмэр оруулж, дуу хоолойгоо хүргэхийг уриалж  байна.