МАН-ынхан хэдэн тэрбум төгрөгөөр барьсан Тусгаар тогтнолын ордныхоо тог, цахилгааны мөнгийг төлж чадахгүйд хүрсэн гэнэ үү?  Дараалсан гурван сонгуульд ялагдсан болохоор төв аппаратынхаа ажилчдын талыг нь цомхотгосон гэнэ үү?

     МАН-ынхан хэдэн тэрбум төгрөгөөр барьсан Тусгаар тогтнолын ордныхоо тог, цахилгааны мөнгийг төлж чадахгүйд хүрсэн гэнэ үү?  Дараалсан гурван сонгуульд ялагдсан болохоор төв аппаратынхаа ажилчдын талыг нь цомхотгосон гэнэ үү? МАН эрх баригч байхаа болиод мөнгөгүй, нэр хүндгүй болж байгаад залуучууд нь эмзэглэж “Шинэчилье” хөдөлгөөнийг өрнүүлээд байгаа билээ. Ирэх даваа гарагт болох МАН-ын Бага хурлаар тэдний тавьсан шаардлагыг томчууд нь хүлээж авах уу, үнэхээр МАН шинэчлэгдэж чадах уу гэсэн асуултыг олон мянган гишүүд нь харж байна. Энгийн гишүүд нь МАН шинэчлэгдэх цаг болсон гэж хүлээн зөвшөөрч байгаа бол хуучин дарга нар нь суудлаасаа салах дургүй байгаа нь үнэн. Залуучуудтайгаа ширүүн тэрсэлдэхгүй аргалж байгаад хурлыг өнгөрөөх өнгө аяс эхнээсээ харагдаж эхэллээ.

    Ялангуяа  “Шинэчилье” хөдөлгөөнийхөн өнгөрсөн сонгуульд хэн, хэдэн төгрөг зарцуулсан талаар   ил болгохыг шаардаж байгаа учир санхүү барьсан томчуудын хувьд нэлээн хэцүү даваа болж байгаа бололтой. Дээр нь авлигын хэрэгт холбогдсон гишүүдээ намаасаа хөөнө гэхээр намдаа мөнгө өгдөг хэд, хэдэн хүнийг жагсаалтаас хасахад хүрээд байгаа гэж эх сурвалж мэдээллээ. Олон жил намын санхүүг удирдсан хүмүүс өөр хоорондоо холбоотой байж, тооцоо санхүүгээ олон нийтэд дэлгэдэггүй байсан. Тиймээс залуучуудын тавьсан энэ шаардлагад хэрхэн хандах вэ гэдгээ сайтар ярилцаж байгаа гэнэ.
    Айл гэр, албан байгууллага, намын хувьд ч санхүү чухал. Гэрийн эзэн, байгууллагын захирал, намын дарга нь санхүү, мөнгө хөрөнгөө ямар нэг хэмээгээр хянаж байдаг. Тиймээс санхүүгийн асуудлаа дэлгэх болохоор Ө.Энхтүвшин дарга, генсек Г.Занданшатар нар хариу хэлэх хэрэгтэй болно.

   “Шинэчилье” хөдөлгөөний залуус ч намын даргадаа мөнгө төгрөгийн асуудлыг заавал ярилцах ёстой, дараад өнгөрөөгүй гэдгээ янз бүрийн аргаар ойлгуулахыг оролдож байгаа гэж эх сурвалж мэдээллээ. Тиймээс ч Ө.Энхтүвшинг анх өөрсөдтэй нь адил энэ намыг шинэчлэх гэж гарч ирж байсныг сануулсаар байна.  МАХН 1996 онд Засгийн эрхээс анх удаа бууж сөрөг хүчин болоход “хоёр Энх” намдаа шинэчлэлийг анх эхлүүлж, 1997 оны Ерөнхийлөгчийн сонгуулийн дараа Н.Энхбаяр МАХН-ын дарга, УИХ дахь МАХН-ын бүлгийн даргаар сонгогдож байсан. “Ө.Энхтүвшин дарга МАН-ын шинэчлэлийн жигүүр байгуулаад явж л байсан. Тухайн үедээ бидэнтэй адилхан жаргал, зовлон туулаад, хаалганы гадна хэн нэгэн албан тушаалтнаас хариу сонсох гэж хүлээдэг л байсан. Одоо намын даргын байр суурин дээр ирчихсэн учраас биднийг дэмжих тал дээр юу ч байхгүй болчихож. Манай монголчууд ярьдаг шүү дээ хэн байснаа мартах ёсгүй гэж. Түүнтэй адилхан Ө.Энхтүвшин дарга хэн байснаа эргэж санах ёстой байх. Энэ нь шинэчлэлийн залуусыг харах ёстой гэсэн үг юм. Бид Ө.Энхтүвшин даргатай хэд хэдэн удаа уулзсан. Гэхдээ тэрбээр онолоос өөрийг ярьж байгаагүй” гэцгээж байгаа юм.

    Ямартаа ч МАН-ыг шинэчилнэ гэх Бага хурал Ө.Энхтүвшин даргыг хэн байснаа санаж, намын мөнгийг юунд зарцуулсныг ч бас дэлгэхийг шаардаж байна.