Өчигдөр хуралдсан МАН-ын УЗ-ийн хурал нилээд ширүүн өнгө аястай болжээ. Бас УЗ-ийн гишүүд хурал дууссаны дараа хэсэг бүлгээрээ үргэлжлүүлэн хуралджээ. Тэд "Олон зүйлсээс болж таван сонгууль дараалан ялагдсан. Энэ бүхнээ Их, Бага хурлаараа ярилцах ёстой" гэжээ. Мөн тэдний ярианы сэдвийн нэг нь “Шинэчилье” хөдөлгөөний залуусын тухай байжээ. Сүүлийн үед “Шинэчилье” хөдөлгөөнийхөн олон бодлогогүй алхмуудыг хийж байна. Тухайлбал Бага хурлаа өөрсдөө зарлаад удирдлагуудаа оролцуулахгүй хийнэ гэж юу гэсэн үг вэ? Хэрэв тэгвэл тэдний хуралд өөрсдөө л суух биз дээ. Өөр хэн суух вэ гэж инээлджээ.

Мөн “Шинэчилье” хөдөлгөөний залуус дундаа хагаралдаж дөрөв хуваагдсаныг ч өөр хоорондоо ярилцжээ. Үнэхээр МАН-аа ялагдал хүлээсний дараа шинэчлэл ярьж гарч ирсэн залуус хоорондоо эв түнжин, үзэл санаа нэг биш байгаа тухай яриа мэр сэр гарч эхэлсэн. Харин өчигдрийн УЗ-ийн гишүүд тэднийг дөрөв хуваагдсан гэж нотолсон байна. Тэдний ярианаас сонсвол дараах байдлаар “Шинэчилье” хөдөлгөөнийхөн хуваагджээ.

1.    Гадаад явагсад: МАН-ын “Шинэчилье” хөдөлгөөн цаашид хэрхэн үргэлжлэхэд ач холбогдол өгөхгүй байгаа залуус буюу гадаад явагсад. Тэднийг НАМЗХ-ны тэргүүн Н.Оюун-Эрдэнэ тэргүүлж байгаа аж. Мөн Сүхбаатар дүүргийн Засаг дарга асан Б.Баярмагнай ч “Шинэчилье” хөдөлгөөнд явж байгаад АНУ-д сурахаар явчихжээ. Уг нь Б.Баярмагнайг асуудалд ноён нуруутай ханддаг тун дажгүй залуу гэж МАН-ын ах эгч нар дүгнэжээ. Энэ мэтээр “Шинэчилье” хөдөлгөөнөө орхин гадаад явагсад олон байгаа аж. Мөн намыг ялагдал хүлээхэд үнэтэй хувь нэмэр оруулсан залуусыг тэргүүлэгч Н.Оюун-Эрдэнийн үед л залуусаа татаж чадсангүй гэж УЗ-ийн гишүүд дүгнэлтүүдийг хийж эхэлсэн байна.

2.    У.Хүрэлсүхийг дагагсад: МАН-ын залуусын “Шинэчилье” хөдөлгөөнийхөн анхнаасаа намаа шинэчилье гэсэн нэгдмэл үзэл санаатай байгаагүй аж. Харин намын шинэчлэл ярьж гарч ирэхэд бүх бүлэглэлийн төлөөлөл байх ёстой гэсэн зорилгын үүднээс “ах нар” нь гар хөлийнхөө үзүүрийг шургуулчихжээ. Тэд нь үзэл бодол ярих биш цаад эздийнхээ заавраар хөдлөхөөс гадна “Шинэчилье” хөдөлгөөн дунд юу болж байгааг мэдээлэгчийн журмаар ажилладаг гэнэ. Угаасаа энэ хөдөлгөөнийг У.Хүрэлсүхийг далд эзэн нь хэмээн бичигдсээр ирсэн. Тийм ч учраас энэ хөдөлгөөний олонх нь У.Хүрэлсүхийн залуус аж. Тухайлбал хөдөлгөөний тэргүүн УИХ-ын гишүүн Ж.Эрдэнэбат, Л.Оюун-Эрдэнэ, найрагч Ж.Мөнхбат, твиттерчин Цогт-Эрдэнэ, дуучин Л.Хаянхярваа, мисс Ё.Нямжав гээд халаасных нь залуус олон байгаа. Тэд энэ хөдөлгөөн дундаа олонхоороо түрий барих болсон нь бусаддаа ч таалагдахгүй байгаа сурагтай.

3.    М.Энхболдыг дагагсад: МАН-ын даргад зүтгэж байгаа М.Энхболд өөрийнхөө нөлөөллийг намынхаа бүхий л хүрээнд хадгалахыг зорьж байна. Энэ бодлогынх нь нэг хэсэг болж “Шинэчилье” хөдөлгөөнд залуусаа оруулжээ. Сүүлийн үед шинэчлэл ярьж намаа шүүмжлэх болсон нөхөд түүний удирдлагад байдаг гэнэ. Т.Аюурсайхан, Б.Ганхуяг хоёр намын одоогийн ч  удирдлагаа, өмнөх удирдлагаа ч шүүмжилж байсан. Тэд үндсэндээ өөрсдийн бодлоор биш М.Энхболдын заавраар явсан бололтой. Эдгээр бодлогогүй шүүмжлэгсэд дээр Н.Батсүмбэрэл, эсэргүү төлөөлөгч гэгдэх М.Ганбаатар, Б.Амарсанаа, Д.Амарбаясгалан, Б.Энх-Амгалан, Г.Ганбаяр зэрэг хотын бүлэглэлийн залуус У.Хүрэлсүхийнхээс дутахгүй олон аж. Тэд намынхаа эрхийг авахын тулд асуудалд илүү шүүмжлэлтэй хандаж байгаа. Харин У.Хүрэлсүхийнхэн хамгаалалтын бүсээс давшилт хийж яваа.

4.    Бие даасан үзэл бодолтнууд: У.Хүрэлсүхийн ч, М.Энхболдын ч  нөлөөллөөс зугтагсад “Шинэчилье” хөдөлгөөнд байгаа аж. Тэд бол УИХ-ын гишүүн Н.Номтойбаяр, О.Содбилэг тэргүүтнүүд аж. Эдгээр гишүүд “Шинэчилье” хөдөлгөөнийг алсаас У.Хүрэлсүх идэвхитэй удирдаад байгааг мэдэнгүүтээ ихэд дургүйцсэн тухай мэдээлэл ирэв. Тэгээд идэвхитэй байхаа болжээ. Учир нь эрхэм гишүүд залуусаа өөрсдийн сонирхлоор намаа шинэчлэх гэж байгаа гэж бодтол цаанаа бүгд эзэдтэй байсанд бухимдсан гэнэ. Тиймээс энэ хоёр гишүүд У.Хүрэлсүхээс зай барьсан шинжтэй байгаа гэж эх сурвалж мэдээлэв.

Ийнхүү “Шинэчилье” хөдөлгөөний зэс цухуйж түнжин хагарч эхэлсэн байна. Тэд өөрсдийн хүсэл зорилгоор намаа шинэчлэх гэж нэгдээгүй нь цагийн эрхээр тодорхой болж байна. Өнгөц харвал өнгөрсөн богинохон хугацаанд ингэж дөрөв хуваагджээ. Өнгийж сайн харвал бүлэглэлүүдийн төлөөлөл нэгдсэн мэт үзэгдэнэ. Хамгийн хорлонтой нь тэд үнэн сэтгэлээсээ шинэчлэлийн бодлого ярихаасаа илүү бүлэглэлүүдийн сонирхол, цаанаа байгаа эздийнхээ эрх ашгийг хамгаалж ярих болсон байна. Зарим нэр цэвэр гэгдэх залуус “Шинэчилье” хөдөлгөөнийхнөөс зайгаа барьж эхэлсэн сураг гарав. Ийнхүү намаа ялагдсаны маргааш бэлдэж байсан юм шиг бөөнөөрөө гарч ирсэн “Шинэчилье” хөдөлгөөнийхөн ингэж дөрөв хуваагдчихаад байгааг өчигдөр УЗ-ийн зарим гишүүд ярилцсан байна. Цаашдаа хэд ч хуваагдахыг хэлэхэд эрт байна. Яагаад гэвэл тэд намаа шинэчлэх гэсэн үнэн сэтгэлээр биш бүлэглэлүүдийн эрх ашгийг төлөөлж байгаа учраас шүү дээ.