Сайд нар амарч байх хойгуур эдийн засаг хүндэрч, доллар чангарч, хувийн аж ахуйн нэгжүүд алдагдалтай тайлан өгч, төсвийн гүйцэтгэл тасалдаж улс орны байдал улам л уруудах болов. Нөхцөл байдал ийм байхад хяналт тавих үүрэгтэй сөрөг хүчин сураг ажиггүй. Тэд эрх баригчдад хяналт тавих нь байтугай дотооддоо учраа олох гээд ухаангүй байх шиг.

Харин Шинэчлэлийн Засгийн газрынхан өөр хоорондоо шүүмжлэлтэй хандах болсон байна. Бас “Чингэс” бондын мөнгөнөөс болж тар түр хийх болжээ. Учир нь Чингэс бондын мөнгийг олж ирсэн гэх Эдийн засаг хөгжлийн сайд Н.Батбаяр бусдаараа гуйлгах дуртай хэвээрээ байгаа гэнэ. Нэгэнт сөрөг хүчин хяналт тавьж чадахгүй, ард түмнээсээ асуугаагүй учир “Чингэс” бондын мөнгө АН-ын дарга нарын хамаатнуудын аж ахуйн нэгжүүдээр ороод алга болж байгаа бололтой. Дээр нь “Чингэс” бондын мөнгөөр хийх ёстой ажлууд удааширсаар намартайгаа золголоо. Ингээд “Чингэс” бондын мөнгө үргүй зарцуулах, хугацаа алдах нь тодорхой болж эхэлсэн учраас Засгийн газрын гишүүд чи, бидээ тулаад эхэлжээ.

Тухайлбал Шадар сайд Д.Тэрбишдагва “Бондын хөрөнгийг босгосноос хойш нэлээд удчихлаа. “Чингис” бондын мөнгийг хуваарилах асуудлаар Засгийн газрын тогтоол гараад тодорхой салбаруудад бүтээн байгуулалтын ажил хийж эхэлсэн боловч харамсалтай нь энэ үйл ажиллагаа удаан байгааг би шулуухан л хэлчихье. Мэдээж нэг кабинетад байгаа Шадар сайд нь Засгийн газраа шүүмжлэх нь зохимжгүй ч гэлээ салбар хариуцсан хүмүүсийг шахаж шаардаж ажиллуулах нь миний үүрэг. Татвар төлөгчдийн мөнгө болоод “Чингис” бондоор олон ажил хийхээр төлөвлөсөн. Гэтэл хугацаандаа хийж чадахгүй байгаа нь аль аль талын л хариуцлагагүй байдал. Засгийн газрын гишүүд наймдугаар сарын 1-нээс ажилдаа ороод жигдэрчих байх. Ерөнхий сайдыг ажилдаа орохоор энэ талаар нухацтай ярилцаж, бүтээн байгуулалтын ажлыг яаж үр дүнд хүргэх, түргэтгэх  хөрөнгө мөнгийг юунд зарцуулах асуудлаа дахин тодорхой ярих хэрэгтэй л гэж бодож байна” хэмээн байр сууриа илэрхийлж Засгийн газрынхаа гишүүдийн эсрэг үг хэллээ. Үнэхээр түүний хэлдэгээр Шадар сайд нь бусдыгаа хэвлэл мэдээллийн хэрэгсэлээр ил цагаан шүүмжлэх нь зохимжгүй л дээ. Зохимжгүй гэдгээ мэдсээр байж шүүмжилнэ гэдэг бол байдал нилээд ноцтой болж эхэлсний гэрч.

Нэгэнт байдал ингэж хүндэрч буйг мэдсэн Шадар сайд өнөөдөр ажилдаа орох Ерөнхий сайд Н.Алтанхуягийгаа хүлээгээд байгаа аж. Мэдээж Н.Алтанхуягтай үг хэлээ ололцохгүй бол шинэчлэлийн Засгийн газрын хувь заяа улам л бүдгэрнэ. Дээр нь АН-ын сайдууд ч гэсэн бондын мөнгөнөөс болж маргалддаг болсон гэж эх сурвалж мэдээлэв.

Тиймээс “Чингэс” бондын мөнгөнөөс болж Шинэчлэлийн Засгийн газрын гишүүд түнжин муутай байгаа гэсэн мэдээлэл үндсэндээ батлагдаж байна. Учир нь ард түмний нэрээр авсан “Чингэс” бондын мөнгийг Шинэчлэлийн Засгийн газрын гишүүд ах дүү нарынхаа аж ахуйн нэгжүүдэд хувиарлан ажил гүйцэтгүүлж байгаа. Нөгөөдүүл нь ажлаа гүйцэтгэж чадахаа больж хугацаа алдаж эхэлсэн тухай мэдээлэл өдөр бүрээр нэмэгдэх боллоо. Хэрэв энэ үнэн бол АН-ынхан ард түмний нэрээр авсан зээлээрээ ах дүүсээ наадуулж байна гэсэн үг. Өдөр бүрээр өр нь нэмэгдэж байгаа. Мэдээж ард түмний татварын мөнгөөр төлнө.

Ийм байдлаас болоод Шинэчлэлийн Засгийн газрын сайдууд эв түнжин муутай болжээ. Тэдний хоорондын харилцаа “Чингэс” бондын мөнгөний муу зарцуулалтаас болоод улам л дордож эхэлсэн гэж шаргал ордноос мэдээлэв. Ингэж хэврэгшиж байгаа харилцаан дээр нь сөрөг хүчний тоглолт ороод ирвэл Шинэчлэлийн Засгийн газар дотооддоо ихээхэн асуудалтай тулгарах нь тодорхой боллоо.