Нийслэлийн автозамын газрын дарга асан Д.Бат-Эрдэнийн их хэмжээний мөнгөөр өрөөгөө тохижуулж, машин авсан явдал нийгэмд шуугиан тарьсаар байна. Учир нь “хурган дарга” иймэрхүү хэмжээний мөнгөөр өрөөгөө тохижуулж, шинэ машин авч байхад "цаадуул" нь яаж мөнгө идэж байгаа нь ойлгомжтой гэх хэл амыг дагуулсан.  Энэ нь эцэстээ тулж иргэдийн эсэргүүцлийн жагсаалд хүртлээ өргөжлөө. Д.Бат-Эрдэнийн хувьд өмнө нь хуурамч дипломын эзнээр тодорч, түүнээсээ болж Нийслэлийн Авто замын газрын даргын суудлаа өгч байсан удаатай. Мөн Зам засвар арчлалтын газар улсын үйлдвэрийн дарга хийж байх үедээ их хэмжээний мөнгө шамшигдуулсан гэдэг.  Удаа дараа ийн асуудал үүсгэсэн учир МАН-ынхан ч түүнийг  эргүүлэн татах хүсэлтэй байгаа аж.

70 саяар өрөөгөө засуулж, 50 саяар машин авсан Д.Бат-Эрдэнийг эсэргүүцсэн иргэд жагслаа
Өчигдөр л гэхэд Чингэлтэй дүүргийн ИТХ-ын төлөөлөгчид хийгээд иргэд АТГ-ын үүдэнд цугласан юм. Түүний энэхүү  хууль бус үйлдэлд  дургүйцсэн хүмүүс “Хууль бус үйлдлээ зогсоо”, “Ажлаасаа огцор” гэх мэт бичиг бүхий лоозон барин зогсч байлаа. Энэ үеэр Чингэлтэй дүүргийн ИТХ-ын гишүүд, иргэд болон Д.Бат-Эрдэнэ нарын хооронд ширүүхэн маргаан өрнөсөн юм.
Чингэлтэй дүүргийн ИТХ-ын төлөөлөгч Ч.Дэчингалсан “  49 сая төгрөгөөр 3 өрөө байр л засуулсан. Үлдсэн 20 гаруй сая төгрөгөөр 3 өрөөндөө тавилга авч тавьсан. Өнөөгийн нөхцөлд нэг айл орон сууц худалдаж авах хэмжээний мөнгөөр нэг дүүргийн ИТХ-ын дарга ажлын өрөөгөө засна гэдэг  байж болох асуудал биш. Төрийн мөнгөөр ингэж л тоглож байна. Тодорхой хэмжээний хөрөнгөөр өрөөгөө засаж бололгүй л яахав. Гэхдээ хууль зөрчиж болохгүй. Ер нь ИТХ-ын дарга Д.Бат-Эрдэнэ, ИТХ-ын ажлын албаны дарга н.Алтанцацралт гэж энэ нөхдүүд аливаа мөнгө санхүүтэй холбоотой асуудлыг ИТХ-ын тэргүүлэгчдийн хурлаар оруулахдаа энэ мөнгө хэзээний, яасан мөнгө вэ гэж асуухаар ашиглаж, хэрэглэчихсэн мөнгөө одоо орох гэж байгаа юм гэж хэлээд будлиулж батлуулдаг байдал тогтчихоод байгаа" гэв.

Харин иргэдийн төлөөлөл "Чингэлтэй дүүрэг 100 гаруй мянган иргэдтэй. Дүүргийн засаг даргын тамгын газар, ИТХ-ын төсөв дүүргийн иргэдэд зориулсан олон нийтийг хамарсан нэн хэрэгцээтэй төсөвт зарцуулагдах ёстой. Гэтэл өрөөгөө чимэглэх, унаа тэрэг авах зэргийн зүйлд зарцуулагдаж болохгүй" гэсэн юм.
Иргэд “Дүмбэрэл хайрхан”, “Гоулд Рич” компанийг Д.Бат-Эрдэнэ даргын мэдлийнх юм болов уу гэсэн хардлагатай байна
Д.Бат-Эрдэнэ нь 49 сая төгрөгөөр ажлын гурван өрөөндөө засвар хийж, 22.4 сая төгрөгөөр тавилга авч тавьсан байна. Ингэж тэрээр төсвийн мөнгийг ач холбогдолгүй зүйлд үрэхдээ хууль зөрчсөн аж. Д.Бат-Эрдэнэ нь “Дүмбэрэл хайрхан” гэх компаниар ажлын өрөөгөө засуулсныхаа дараа тендер зарлаж, дахин нөгөө “Дүмбэрэл хайрхан” компаниа ялуулжээ.

Үүнийг Чингэлтэй дүүргийн ИТХ-ын төлөөлөгчид “Бараа бүтээгдэхүүн худалдан авах, ашиг сонирхлын зөрчил байхаас гадна эрх мэдлээ хэтрүүлэн ашиглаж хууль зөрчиж байна” хэмээн үзэж байгаа юм.
Мөн Б.Бат-Эрдэнэ нь “Гоулд рич” компаниар өрөөгөө тохижуулсаныхаа дараа мөн л тус компанийг тендерт ялуулжээ. Уг нь номоороо тендер зарлаж, ажил гүйцэтгэгчээ сонгочихоод дараа нь засварын ажлыг хийх учиртай. Гэтэл энд бүх зүйл эсрэгээрээ хэрэгжсэн байгаа юм. Тус үйлдэл нь “Дүмбэрэл хайрхан”, “Гоулд Рич” компанийг Д.Бат-Эрдэнэ даргын мэдлийнх юм боловуу гэсэн хардлагыг төрүүлсээд байгаа. Учир нь Д.Бат-Эрдэнэ нь өмнө нь Зам засвар, арчлалт, улсын үйлдвэрийн газрын дарга байхдаа мөн л эдгээр компаниудаар ажил гүйцэтгүүлж байжээ.
Д.Бат-Эрдэнийг АТГ, Прокурорын газраар шалгуулна

Түүнийг төсвийн мөнгийг үрж, тансаглаж суухыг цаашид хараад сууж байж чадахгүй хэмээн Д.Бат-Эрдэнийг Нийслэлийн прокурорын газар, АТГ-т хандан хууль зөрчсөн эсэхийг шалгуулахаар албан бичгийг явуулжээ.
    Д.Бат-Эрдэнэ: Би хаана ч тансаглана

Тэрбээр  “Би хууль зөрчөөгүй. Чи шалгуулдаг газраараа явж шалгуул. Би хаана ч тансаглана.  Хуучин авто замын газар байхдаа ч ингэж байсан. Зам засвар арчлалт улсын үйлдвэрийн газар байхдаа ч бас иймэрхүү байсан. Үүнийгээ хэнээр  ч заалгуулахгүй. Тэр машины тухайд хурлын ажлын алба машингүй байсан.  Тиймээс машинаа өгсөн. Машин авсан нь тансаглаад байх зүйл ч байхгүй. Солонгосын нэг машин гадаа зогсч байна.  Хэн нэгэн орж ирээд хууль бус үйлдэл хийсэн гээд дайраад байх нь онц биш байна. Миний хувьд товчхондоо гэхэд хууль бус үйлдэл хийж, түүнийгээ нуугаад байгаа зүйл алга. Хууль зөрчсөн эсэхийг шүүх цагдаа нь тогтооно уу гэхээс өөр хэн нэгэн тогтоодог зүйл биш. Надад айж, ичих зүйл алга. Ямар нэгэн хууль зөрччихөөд  суугаад байгаа зүйл алга. Энэ өрөөг та нар хар. Сайхан зассан байна. Үүнийг тансаглал гэж хэлэхгүй. Би одоо ч нэр хүндэд халдлаа гээд холбогдох газарт нь өгмөөр байна. Гэхдээ ингээд гомдол мэдүүлэх цаг оройтохгүй байх. Энэ хүмүүс шалгуулдаг газар нь шалгуулаг. Харин дараа нь  миний гэм буруугүй гэдэг нь  нотлогдох тэр  үед энэ бүхнийг хийнэ" гэв.
Ямартаа ч хурган дарга нарын албан тушаалаа ашиглаж, улсын хөрөнгийг хувьдаа завшсан гэх хэргүүдийг эсэргүүцсэн иргэд эхнээсээ жагсаж эхэллээ. Харин Д.Бат-эрдэнийн тухайд  МАН-ынхан намаасаа хөөж, иргэд эргүүлэн татахаар зэхэж байна.