МАХН-ын дарга Н.Энхбаяр Ерөнхийлөгчийн зарлигаар өчигдөр ялаас чөлөөлөгдлөө. Орой 17.00 цагийн үед Ерөнхийлөгчийн зарлиг гарлаа гэсэн Шум тарж эхэлсэн юм. Улмаар манай сурвалжлах баг  МАХН-ын дарга Н.Энхбаярын хэвтэж буй Клиникийн нэгдсэн II эмнэлгийг зорилоо.
Манай сурвалжлах багийг очиход Н.Энхбаяр дээр хамгийн түрүүнд хүү Э.Батшугар, эхнэр О.Цолмон,  өмгөөлөгч Б.Оюунбилэг нар ирсэн юм. Мөн ШШГЕГ-ын ажилтнууд Ерөнхийлөгчийн зарлигийн танилцуулж байв. Харин төд удалгүй улс төр судлаач  Л.Эрдэнэтуул цэцгийн баглаа барьсаар гүйж орж ирэв. Түүний дараахан эмнэлгийн коридорт Н.Удвал сайд хэсэг хүмүүсийн хамт сэтгүүлчдэд баригдалгүй орж ирсэн байв.  Гэхдээ түүнийг өмнө нь  Н.Энхбаярын өрөөнд байсан уу, эсвэл Н.Энхбаярын өрөө рүү өөр хаалгаар орсон уу мэдэхгүй юм. Ямартаа ч ШШГЕГ-аас Ерөнхийлөгчийн зарлигийг танилцуулаад явсны дараахан 18.30 цагийн үед УИХ-ын гишүүн Д.Тэрбишдагва, Л.Цогийн хамт ирсэн юм.

Харин  хоёр гишүүний дараа О.Баасанхүү гишүүн ирж сэтгүүлчдийн асуултанд хариулсан юм.

О.Баасанхүү: Өнөөдөр /өчигдөр/ өргөст торноосоо гарч байгаа ч эмнэлэгтээ байна
Тэрбээр “Монгол Улсын ерөнхийлөгчийн зүгээс уучлал үзүүллээ гэж байгаа. Гэхдээ энэ бол нэг талаасаа баярламаар юм шиг боловч нөгөө талаасаа гунигтай зүйл юм. Учир нь ШШҮТ-өөс 20 гаруй эмч нарын дүгнэлтээр гарсан зүйл дээр хоёрдмол утгатай хариу өгсөн. Энэ хариултаас болж Прокурорын байгууллагаас 20 гаруй хүмүүсийг асууж, шалгааж байна. Өнөөдөр би Прокурор дээр очиход одоогоор 12 хүнээс асуугаад байгаа. Ирэх долоо хоногиийн дундуур асууж дуусаад дахин ШШҮТ-д оруулна гэж байсан. Гэтэл үнэндээ энэ хооронд хүний амь нас эрүүл мэнд яригдаж байгаа учир Монгол Улсын Ерөнхийлөгчийн хувьд эрүүл мэндийнх нь зүгээс бодоод уучлалт үзүүлсэн болов уу гэж бодож байна. Бид нарын хувьд уучлалт гуйж, царай алдахгүй гэсэн байр суурьтай байгаа. Яагаад гэхээр бид үүнийг улс төрийн хэлмэгдүүлэлт гэж үзэж байгаа. Хойшид ч үзнэ. Улс төрийн хэлмэгдэлтээр бид тохирдоггүй. Бид ямар ч зүйл тохироогүй. Хуулийн байгууллага, Монгол Улсын урдаа барьдаг эмч нарын дүгнэлтийг ингэж хүнд суртал гаргаагүй байсан бол өнөөдөр энэ бүхэн эрүүл мэндийн асуудлаар шийдэгдэх ёстой байсан. Жишээ нь Т.Билэгтийн хувьд хэрэг нь хэрэгсэхгүй болгоод гарч явсан хойгуур нь нөгөөх нь улс төржсөн. Тэгээд ирэнгүүт нь 70 гарсан хүнийг ганц худагт хийсэн”.
Даргатайгаа уулзсаны дараа "Манай намынхан болон бид нарын хувьд хүний амь аврагдсанд баяртай байгаа. Учир нь үнэхээр үхлийн эрмэг дээр байсан. Өнөөдөр бол өргөст торноосоо гарч байна. Өргөст торноосоо гарсан ч эмчилгээ үргэлжилнэ. Бид нарын хувьд энэ хүнийг хамгийн сайн эмчилж болох бүх газрыг эрж хайж олно. МАХН үргэлж тууштай байсан. Цаашид ч цагаатгах ёстой гэсэн байр суурьтай байна".

Улмаар 19.00 цагийн үед З.Баянсэлэнгэ гишүүн ирлээ. Түүнийг ирэх үед МАХН-ын зарим залуучууд, дэмжигдчийн хамт аль хэдийн цугласан байлаа.

Ийн экс ерөнхийлөгчтэй уулзах хүмүүс нь хэсэг хэсгээр орж уулзсаар   19.30 цагийн үед эхнээсээ гарч ирэв.
Өмгөөлөгч Б.Оюунбилэг: Олон улсын байгууллагууд руу хүсэлт явуулж хэргийг цагаатгах тал дээр хөөцөлдөнө

Тэрбээр "Баттай ялаас нь уучилж байна гэсэн үг.  Харин хэрэг цагаадаж байгаа хэрэг биш. Мэдээж цаашдаа олон улсын байгууллагууд руу хэргийг цагаатгах тал дээр бүхий л журмын дагуу хөөцөлдөж ажиллана. Нэг талаасаа торны цаанаас суларч байгаа нь сайн талтай боловч нөгөө талаас хэрэг цагаадаагүй, хэрэгсэхгүй болгоогүй, ялаас нь үлдсэн хэсгийг нь уучлалаар чөлөөлж байна. Биеийн байдал нь муу байгаа. Эхний ээлжинд эмчилгээний асуудлыг хөөцөлдөнө. Уучлал үзүүлэх тал дээр гэнэтийн зүйл боллоо. Харин ялаас өвчний учраас чөлөөлөгдөх хүсэлтийг бид хөөцөлдөж байсан. Бид прокурортой уулзсан дахин шинжээч томилно гэж яригдаж байсан. Одоо бол бүх юм өөрөө эргэлээ. Ямартаа ч Монгол Улсын ерөнхийлөгч бүрэн эрхийнхээ хүрээнл зарлиг гаргасанд талархаж байна".

Эрүүл мэндийн сайд Н.Удвал: Шоронгоос эмнэлэгт шилжлээ

- "Ямарч байсан шоронгоос гарч эмнэлэгт шилжсэн. Эмчилгээгээ үргэлжлүүлж байна. Ямар ч байсан энэ хүний амь насыг аврах боломж бүрдсэнд баяртай байна. Өрөөгөө шилжүүлээд энгийн өрөөнд орчихлоо".
УИХ-ын гишүүн З.Баянсэлэнгэ: Иргэний эрүүл мэндийг өөрөө өөрт нь даатгаад орхиж байна

Намуудын хооронд тохиролцоо хийгдсэн гэж хүмүүс яриад байна. Гэхдээ тохиролцоо хийгээгүйг би итгэлтэй хэлнэ. Өнөөдрийн гаргасан шийдвэрийг хүлээн зөвшөөрөхгүй байгаа нь үнэн. Бид цагаатгах ёстой гэж үзэж байсан. Хувь хүний биеийн байдал муу, эрсдэлтэй байгаа эрүүл мэндийнх нь байдлыг өөрт нь даалгаж үлдээлээ гэж үзэж байгаа. Одоо гадагшаа явж нарийн мэргэжлийн шинжилгээ, оношлогоонд хамрагдах ёстой. Эрчимтэй эмчилгээ хийлгэж байж хөл дээрээ зогсох ёстой. Энэ баярт мөчтэй давхцаад эмнэлэгт байх юм уу, гарах юм уу гэж асуугаад байх хүн алга. Эмч нар нь шийдвэр гаргаж гэртээ гарах уу, эмнэлэгтээ байх уу гэдгээ шийдэх байх.  Хамгийн гол нь иргэний эрүүл мэндийг өөрөө өөрт нь даатгаад орхиж байна.
Улмаар  20.30 цагт МАХН-ын дарга Н.Энхбаярыг хүү Э.Батшугар, УИХ-ын гишүүн Д.Тэрбишдагвын хамт түшсээр гарч ирсэн юм. Н.Энхбаяр гарч ирсэн даруйдаа “Энэ хугацаанд намайг хайрлаж, дэмжиж байсан монголын ард түмэндээ баярлалаа” гэсэн юм. Энэ үеэр сэтгүүлчид түүнээс Ерөнхийлөгч Ц.Элбэгдоржийн гаргасан Уучлал үзүүлэх зарлигийн талаар өөрийн байр суурийг нь асуусан ч тэрээр асуултад ямар нэгэн хариулт өгөлгүй машиндаа суусан юм. Машиндаа суухынхаа өмнө тэрээр хоёр гараа хавсран дөрвөн зүгрүү харж залбирсан юм. Жил гаруйн хугацаанд гэртээ хариагүй учраас гэр рүүгээ явахыг хүссэн нь ойлгомжтой. Гэхдээ тэрбээр буцаж эмнэлэгтээ ирнэ гэж намынхан нь хэлж байв.  Ингээд  эмнэлгийн машин болоод хэд хэдэн машинтай хүмүүс Н.Энхбаярын гэрийн зүг хөдөлсөн юм.
ШШГЕГ-ын ажилтнууд Ерөнхийлөгчийн зарлигийг танилцуулаад явсны дараа МАХН-ын удирдлагууд бүгд тус эмнэлэг дээр цугласан байв. МАХН-ын дэд дарга Д.Тэрбишдагва, Л.Цог, намын нарийн бичгийн дарга Ч.Чимэдцэрэн нар хамт ирсэн бол тэдний араас УИХ-ын гишүүн Ц.Цолмон, З.Баянсэлэнгэ, Н.Энхбаярын эхнэр О.Цолмон нар ирлээ. Ингээд тэд сэтгүүлчид цугласан хаалгаар эмнэлэг рүү нэвтэрсэн бол Н.Энхбарын эхнэр О.Цолмон нэг давхрын нууц хаалгаар сэтгүүлчдийн хараанаас бултан орсон юм. Ийнхүү намын удирдлагууд цугласны дараа эмнэлгийн гадна МАХН-ын гишүүд, дэмжигчид болох 80 гаруй хүн цугларлаа. Тэд “Ашгүй дарга минь суллагдлаа. Нар баруунаас гарч, надаас найман ихэр хүүхэд төрсөн мэт сайхан байна” хэмээн хашгиран сэтгэл хөдлөлөө илэрхийлж байв.