МАН, АН-ын цөөнгүй улс төрчид Н.Энхбаярыг эмнэлэгээс гарсны маргааш нь буюу өчигдөр гэгээн дүрээ харуулах гэж очжээ. МАН-ын хувьд Ө.Энхтүвшин, Б.Бат-Эрдэнэ, Д.Загджав тэргүүтэй цөөхөн улс төрчид Н.Энхбаяртай сайн харилцаатай үлдсэн. Б.Бат-Эрдэнэ гишүүн түүнийг баригдахад нь очих гэж явсныг Монгол даяараа харсан. Ө.Энхтүвшин түүнийг эмнэлэгт эргэж бас өлсөглөн зарласан ээжүүд дээр очиж ихээхэн дуулиан болж байлаа. УИХ-ын гишүүн асан Д.Загджав түүнийг шоронд байхад нь эргэж очсоноо нууж хаалгүй зарласан. Тиймээс эдгээр хүмүүс эргэж очсон байхад гайхахгүй.

Харин Н.Энхбаярыг эргэж очих нь байтугай түүнийг дурсах ч дургүй хүмүүс эргэж очсон байвал харин гайхах сэтгэгдэл төрнө л дөө.

МАН ирэх нэгдэх өдөр удаан дуншсан дуулиант Бага хурлаа хийх гэж байна. Ийм хурлын өмнө МАН-ын гишүүд Н.Энхбаяр дээр гүйж очоод байх нь сайны шинж биш л дээ. Тэгээд ч МАН дотор Н.Энхбаярын дэмжлэгээр гарч ирсэн олон залуучууд бий. Бас түүнийг дэмжиж байсан бүлэглэлүүдийн төлөөлөл ч олноороо бий. Энэ бүхэн Н.Энхбаярыг санагалзаж байж мэдэх юм. Хачирхалтай нь тэд Н.Энхбаярыг нарсанд байхад очоогүй мөртлөө наранд гарсных нь маргааш гүйж очно гэдэг бол улс төрчдөөс л гарах араншин л даа.
Харин АН-ын зарим хүмүүс Н.Энхбаярыг эргэж очсоныг ойлгоход төвөгтэй асуудал юм. АН-д элсэж орсон Н.Энхбаярын улаан хамгаалагч байсан Д.Арвин эргэж очсон сураг гарав. Тэр мэдээж хүн чанарын асуудал гэж л тайлбарлах байх л даа. Гэхдээ МАХН-д биш АН-д элссэн түүнийг Н.Энхбаяр ойлгох эсэхийг хэлж мэдэхгүй юм. АН-ын нөлөө бүхий гишүүдээс нэг бус хүн Н.Энхбаярыг өчигдөр эргэж очсон гэж эх сурвалж мэдээлсэн. Удахгүй тэдний нэр хэвлэлцээр цуварч эхлэх биз.

Ийнхүү Н.Энхбаярын нөлөө улс төрд хэвээрээ байгаа нь харагдаж эхэллээ. Удахгүй тэр биеэ эмчлүүлэхийн зэрэгцээ цагаатгал ярьж, МАН-ын шинэчлэлд тээг тавьж улс төрийг улам ч сонирхолтой байлгах нь тодорхой боллоо.